ޕާކިސްތާނުގެ ލާހޯރުގައި ހިތުގެ ބަލިތަކަށް ހާއްސަކޮށްގެން ހިންގާ ހޮސްޕިޓަލަކަށް އަމާޒުކޮށް އެގައުމުގެ ގާނޫނީ ވަކީލުންތަކެއް ހަމާލާދީ 3 ޕޭޝަންޓަކު މަރާލި މައްސަލައާއި ގުޅިގެން، ޕާކިސްތާނުގެ ބޮޑުވަޒީރު އިމްރާން ހާންއަށް ބޮޑުބޭބެކިއާ ހަސަން ނިޔާޒީ ހައްޔަރު ކުރުމަށް މަސައްކަތް ކުރަމުން އަންނަ ކަމަށް އެގައުމުގެ ފުލުހުން ހާމަކޮށްފިއެވެ.
ހަސަން ނިޔާޒީ ދިރިއުޅެމުންދިޔަ ގެވެސް މިހާރު ރެއިޑުކޮށްފައިވާ ލާހޯރުގެ ފުލުހުން ބުނާ ގޮތުގައި އެނާ މިހާރު ވަނީ ފިލާފައެވެ.
މައުލޫމާތު ލިބޭ ގޮތުގައި ނިޔާޒީއަކީ ހޮސްޕިޓަލަށް ގެއްލުންދީ، ޑޮކްޓަރުންނާ ކުރިމަތިލި އެތައް ސަތޭކަ ގާނޫނީ ވަކީލުންނެއްގެ ތެރޭގައި ހިމެނި، އެކަމުގައި ބައިވެރިވި މީހެކެވެ. ސޯޝަލް މީޑިއާގައި ދައުރުވަމުންދާ ފޮޓޯތަކުންވެސް ނިޔާޒީ ފާހަގަވާން ހުރެއެވެ.
މި ހަމަނުޖެހުންތަކުގައި ބައިވެރިވިކަމަށް ޚުދު ނިޔާޒީވެސް ވަނީ އޭނާގެ ޓްވިޓާ އެކައުންޓް މެދުވެރިކޮށް އިއުތިރާފުވެފައެވެ. އަދި އެކަމުގައި ބައިވެރިވެވުނީތީ ހިތާމަ ކުރާ ކަމަށްވެސް ނިޔާޒީ ވަނީ ބުނެފައެވެ.
ލާހޯރުގެ ހޮސްޕިޓަލަށް ދިން ހަމަލާތަކުގައި އެއާއިލާގެ މެމްބަރެއްގެ އަތެއް ހިމެނޭކަމަށް ދެކެވޭ ވާހަކަތަކާ ގުޅިގެން ޕާކިސްތާނުގެ ބޮޑުވަޒީރު އަދި ވަކިއެއްޗެއް ވިދާޅުވެފައެއް ނުވެއެވެ.
