މާލީއާއި ހިއްސާކުރާ ސަރަހައްދީ އިން ކައިރާގައި އަޅާފައިވާ ނައިޖާގެ އަސްކަރީ ކޭމްޕަކަށް އަމާޒުކޮށް އެތައް ސަތޭކަ ހަނގުރާމަވެރިންތަކެއް ވެގެން ދިން ހަމަލާތަކުގައި، ނައިޖާ އަސްކަރިއްޔާގެ 71 ސިފައިންގެ މީހަކު މަރާލައިފިއެވެ.
މިއީ ހައްދުފަހަނައަޅާފައިވާ ހަނގުރާމަވެރިންގެ އުނދަގޫތައް 2015 ވަނަ އަހަރު ބޮޑުވާން ފެށިފަހުން ނައިޖާގެ އަސްކަރިއްޔާއަށް އަމާޒުކޮށް ދިން އެންމެ ނުރައްކާތެރި ހަމަލާ ކަމަށް މައުލޫމާތު ލިބެއެވެ.
ނައިޖާގެ ދިފާއީ ވުޒާރާއިން އާންމު ކުރި ބަޔާނެއްގައި ބުނެފައިވަނީ މި ހަމަލާގައި އަސްކަރިއްޔާގެ 71 މީހެއްގެ ފުރާނަ ގެއްލިދިޔައިރު، އިތުރު 12 މީހަކަށް އެކި ވަރުގެ ޒަހަމްތައް ލިބިފައިވާކަމަށެވެ.
އެތައް ސަތޭކަ ޓެރަރިސްޓުންވެގެން އަސްކަރީ ކޭމްޕަށް ހަމަލާދިން ހަމަލާތަކުގައި، ހަނގުރާމަވެރިންގެ ބައެއްގެ ފުރާނަ ގެއްލިފައިވާނެ ކަމަށްވެސް ނައިޖާގެ ދިފާއީ ވުޒާރާއިން ވަނީ ހާމަކޮށްފައެވެ.
ހަމަލާ ބަދަލުކުރުންތައް 3 ގަޑިއިރެއްހާއިރަށް ދެމިގެންދިޔަ ކަމަށާ، ހައްދުފަހަނައަޅާފައިވާ ހަނގުރާމަވެރިން ހަމަލާ ދިނުމަށް ބޭނުންކުރަމުންދިޔައީ ގޮވާތަކެއްޗާ ކަމަކާޒީ އުޅަނދުތައް ކަމަށް ނައިޖާގެ އަސްކަރިއްޔާއިން ވަނީ ހާމަކޮށްފައެވެ. މިއީ އަމިއްލައަށް މަރުވެގެން ހަމަލާ ދިނުމަށް ބޭނުންކުރާ ގޮތަށް ފަރުމާކޮށްފައިވާ އަސްކަރީ ދަރަޖައިގެ އުޅަނދުތަކެކެވެ.
މިއީ ހައްދުފަހަނައަޅާފައިވާ ހަނގުރާމަވެރިންގެ ކޮން ޖަމާއަތަކުން ޒިންމާ ނަގަންޖެހޭ ހަމަލާއެއް ކަމަށް ނައިޖާގެ އަސްކަރިއްޔާއިން އަދި ހާމަކޮށްފައި ނުވާއިރު، މި ހަމަލާގެ ޒިންމާ އެއްވެސް ޖަމާއަތަކުން ނެގި ކަމުގެ ރިޕޯޓެއްވެސް އަދި ލިބިފައެއް ނުވެއެވެ.
