އިލެކްޓްރޯނިކް ގޭމްތަކަކީ ޒުވާނުންގެ ދީނީ ވާޖިބުތަކަށް ހުރަސް އަޅާ އެއްޗެއް ކަމަށް މިއަދުގެ ހުކުރު ހުތުބާގައި ބުނެފިއެވެ.

"ﷲ ހަނދުމަކުރުމުން އެއްކިބާ ކުރާ ކޮންމެ ކަމަކުން ދުރުހެލިވުން" މިމައުޟޫއަށް މިއަދު އިއްވި ހުތުބާގައި ބުނެފައިވަނީ މުނިފޫހިފިލުވުމުގެ ގޮތުން އިސްލާމީ އުސޫލުތަކާއި އަދަބުތަކާ ހިލާފު ނުވާގޮތަށް ހެދިފައިވާ ގޭމްތައް ކުޅުމަކީ އިސްލާމްދީން މަނާކުރާ ކަމެއް ނޫން ކަމަށެވެ.

އަދި ވަގުތު ބޭކާރު ކުރުމަކާ ނުލައި ދަރިންގެ އަހުލާގާއި ސުލޫކަށް ހެޔޮ ބަދަލުތައް އަންނަ އަދި ދަރިންގެ އިލްމީ ފެންވަރު ރަނގަޅުވެ ވިސްނުން ތަރައްގީވާ ފަދަ ގޭމްތައް ކުޅުމަށް މައިންބަފައިން ދަރިންނަށް ފުރުސަތު ދިނުމަކީ އެދެވިގެންވާ ކަމެއް ކަމަށާއި ނަމަވެސް ބައެއް އިލެކްޓްރޯނިކް ގޭމްތަކަކީ އިސްލާމީ އަގީދާ ފުނޑުފުނޑުކޮށްލާ ފަދަ ގޭމްތަކެއް ކަމަށެވެ.

އެފަދަ ގޭމްތަކުގެ އެންމެ ނުރައްކާތެރި ކަމަކީ އެކުޅޭ މީހާ އަޅުވެތިކޮށްލުން ކަމަށާއި އެގޮތުން އެއަށް ދެވި ހިފުމުގެ ސަބަބުން އޭނާގެ އަގުހުރި ވަގުތުތައް ބޭކާރު ކޮށްލާ ކަމަށާއި، ފަރުޟު ކުރައްވާފައިވާ ފަރުޟުތައް އަދާ ކުރުމުން ދުރުހެލި ކުރުވާ ކަމެއް ކަމަށް ހުތުބާގައި ބުނެފައިވެއެވެ.

މީގެއިތުރުން ބައެއް ދަރިވަރުން، ފިލާވަޅު ދަސްކުރަން އޮންނަ ވަގުތު ގޭމްކުޅެން ހޭދަ ކުރުމުގެ ސަބަބުން މަދްރަސީ ދައުރު ފުރިހަމަ ނުވަނީސް ސްކޫލުން ވަކިވާން ޖެހޭކަމީ ހިތާމަހުރި ކަމެއް ކަމަށާއި އަދި އެފަދަ ގޭމްތައް ކުޅުމަކީ ވަޒީފާއާއި އާއިލާގެ ކަންތައްތަކުގައި ވެސް އިހުމާލުވެވޭ ކަމެއް ކަމަށްވެސް ހުތުބާގައި ބުނެފައިވެއެވެ.

އިލެކްޓްރޯނިކް ގޭމްތަކުން ލިބޭ ގެއްލުންތައް ދިރާސާކުރާ ފަރާތްތަކާ ހަވާލާދީ ޚުތުބާގައި ބުނީ އެފަދަ ގޭމްތައް ކުޅޭ ޒުވާނުންގެ މެދުގައި ކުށް ކުރުމާއި މީހުން މެރުން ފަދަ ބޮޑެތި ކުށްތަކަށް އަރައިގަތުމުގެ ހިޔާލު އަށަގަތުމުގެ އިތުރުން އަމިއްލަ ނަފްސަށް ގެއްލުން ދިނުމުގެ ހިޔާލުވެސް އުފެދޭ ކަމަށެވެ.

އެފަދަ ޒުވާނުންގެ ކިބައިން މުރާލިކަން ކެނޑި، ކަންނެތްކަން އަށަގަންނަ ކަމަށާއި، ގޭމްކުޅެން ގިނަވަގުތު ހޭދަކުރާއިރު އޮށޯވެ އޮވެވޭ ގޮތަކުން ނުވަތަ އިށީނގެ އިނދެވޭ ގޮތަކުން ބުރަކަށީގައި ރިއްސައި ބުރަކަށި ގުދުވެ، މައިބަދައަށް ބޮޑެތި ގެއްލުންތައް ލިބޭ ކަމަށްވެސް ބުނެފައިވެއެވެ.

ދިރާސާތަކުން ދައްކާ ގޮތުން އިލެކްޓްރޯނިކް ގޭމްތަކުގެ ތެރޭގައި ހިމެނޭ ޕަބްޖީ އާއި، ޖަސްޓު ކޯސް އާއި ޕޯކެމޯން ގޯ އާއި ފޯޓްނައިޓް ފަދަ ގޭމްތަކަކީ ޒުވާނުންގެ ދީނީ ވާޖިބުތަކާއި ދުނިޔަވީ ވާޖިބުތައް އަދާ ކުރުމަށް ހުރަސް އެޅުމުގެ އިތުރުން ވަރަށް ގިނަ ތަފާތު ގެއްލުންތައް ކުރިމަތިކުރުވާ ގޭމްތަކެއް ކަމަށް ހުތުބާގައި ބުނެފައިވެއެވެ.

މި ސަބަބުތަކާ ހުރެ ބައެއް ގައުމުތަކުގައި މިފަދަ ބައެއް އިލެކްޓްރޯނިކް ގޭމުތައް މަނާކޮށްފައިވާ ކަމަށްވެސް ހުތުބާގައި ފާހަގަކޮށްފައިވެއެވެ.

ހަބަރު ދީން