ހަކުރު ބަލީގެ މީހުންނަށް ދޭ އާންމު އިންސިއުލިން ފަރުވާއަށް ހިނގާ ބޮޑު ހޭދައަކީ މާޒީކަމުގައި ހަދާދޭނެ ވަރުގަދަ މަޝްރޫއެއް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯއިން) ފަށައިފިއެވެ.
ބައިނަލްއަގުވާމީ ފެންވަރުގައި ފާހަގަކުރަމުންދާ ދުނިޔޭގެ ހަކުރު ބަލީގެ ދުވަހާ ދިމާކޮށް ޑަބްލިއުއެޗްއޯއިން ފަށާފައިވާ މަޝްރޫއަކީ، އިންސިއުލިން ފަރުވާއަށް ހިނގާ ހޭދަ ކުޑަކުރުމަށް ބޭސް އުފައްދާ ކުންފުނިތަކާ ގުޅިގެން ހިންގާ މަޝްރޫއެކެވެ.
ޑަބްލިއުއެޗްއޯގެ ޑައިރެކްޓާ އޮފް ރެގިއުލޭޝަން އޮފް މެޑިސިންސް އެންޑް ހެލްތް ޓެކްނޮލޮޖީޒް އީމާ ކުކީ ވިދާޅުވީ، ހަކުރު ބަލީގެ ޝިކާރައަކަށްވާ މީހުންގެ އަދަދު އިތުރު ވަމުން އަންނައިރު، ޑައިބީޓީޒްގެ ފަރުވާއެއްގެ ގޮތުގައި ބޭނުން ކުރަމުން އަންނަ އިންސިއުލިން ލިބެން ހުންނަ މިންވަރު މަދުކަމީ ގަބޫލުކުރަން ޖެހިފައިވާ ހަގީގަތެއް ކަމަށެވެ.
މިކަން ހައްލުކުރުމަށްޓަކައި މިހާރަށްވުރެ ފުޅާދާއިރާއެއްގައި ދުނިޔޭގެ ބާޒާރަށް އިންސިއުލިން ސަޕްލައިކޮށްދޭނެ ކުންފުނިތަކެއް ހޯދުމުގެ މަސައްކަތް ޑަބްލިއުއެޗްއޯއިން ކުރަމުން އަންނަކަން ފާހަގަކުރައްވާ ކުކީ ވިދާޅުވީ، މި މަޝްރޫއުގެ ތެރެއިން އިންސިލިން ފޯރުކޮށްދެވޭ މީހުންގެ އަދަދު އިތުރުކުރެވޭތޯ އެ ޖަމިއްޔާއިން ބަލަމުންދާނެ ކަމަށެވެ.
އިންސިއުލިންގެ އަގުބޮޑުވެ ފަރުވާ ހަނިވުން
އިންސިއުލިން ސަޕްލައި ނުލިބި އަގު އުފުލެމުން ދިއުމުގެ ސަބަބުން، ހަށިގަނޑަށް ބޭނުންވާ އިންސިއުލިން ފޯރުކޮށްދިނުމުގައި އެކަށީގެން ނުވާ ފަދަ ލިމިޓްތަކެއް ގެންގުޅުމަށް ބައެއް ގައުމުތަކަށް މަޖުބޫރުވެފައިވާކަން އދއިން ވަނީ ފާހަގަކޮށްފައެވެ. މިއާއެކު ހާޓްއެޓޭކްއާއި ސްޓްރޯކް ޖެހުމުގެ އިތުރުން ކިޑްނީ ފެއިލްވުމާ ލޯ އަނދިރިވުމާ، ފައި ބުރިކޮށްލުން ފަދަ ހިތްދަތި އަދި ފުރާނައަށް ނުރައްކާތެރި ހާލަތްތަކާ ކުރިމަތިލާންޖެހޭ ޕޭޝަންޓުންގެ އަދަދު އިތުރުވެއެވެ.
ޑަބްލިއުއެޗްއޯގެ މެޑިކަލް އޮފިސާ އަދި ހަކުރު ބަލީގެ ތަޖުރިބާކާރު ޑރ ޖޯޖްކާ ރޮގްލީކް ވިދާޅުވީ 2016 ވަނަ އަހަރު 7 ވަނައަށް އެންމެ ގިނަ މީހުން ދުނިޔެއިން މަރުވެ ދިޔައީ ހަކުރު ބަލީގައި ކަމަށެވެ. އަދި ހަކުރު ބައްޔަކީ ޅަ އުމުރެއްގައި މީހުންގެ ފުރާނަ ގެއްލިދިއުމަށް މަގުފަހި ކުރާ ބައްޔެއް ކަމީ ކަންބޮޑުވާންޖެހޭ ކަމެއްކަންވެސް އޭނާ ވަނީ ފާހަގަކުރައްވާފައެވެ.
ދުނިޔޭގެ 4 ބައްރަކުން 24 ގައުމެއްގައި ޑަބްލިއުއެޗްއޯއިން ކުރި ދިރާސާގެ ނަތީޖާތައް ދައްކާ ގޮތުން، އިންސިއުލިން ލިބެން ހުރީ މި ގައުމުތަކުގައި ސިއްހީ ހިދުމަތްދޭ ތަންތަނުގެ ތެރެއިން 61 ޕަސެންޓް މަރުކަޒަށެވެ. 2016 -2019 އަށް އެއްކޮށްފައިވާ ތަފާސް ހިސާބުތަކަށް ބަލާއިރު، ގާނާ ފަދަ ގައުމުތަކުގައި ހަކުރު ބަލި ހުންނަ މީހަކު މަހެއްގެ މައްޗަށް އިންސިއުލިންއަށް ކުރަންޖެހޭ ހަރަދަކީ، އޭނާގެ މަހު މުސާރައިގެ 5 ބައިކުޅަ 1 ބަޔަށް ވުރެވެސް ބޮޑު ހަރަދެކެވެ.
