މިދިޔަ ސެޕްޓެމްބަރު މަހުގެ 20 ވަނަ ދުވަހު 20 ސިފައިން ދެއްކި ހިތްވަރާއި ކުރި ބުރަ މަސައްކަތުގެ އަގު ވަޒަންކުރުމުގެ ގޮތުން މެޑައްޔާއި ކުލަ ހަވާލުކޮށްފިއެވެ.
މި ދިޔަ ސެޕްޓެމްބަރު މަހުގެ 20 ވަނަ ދުވަހަކީ އަލިފާނުގެ ބޮޑު ހާދިސާއެއް މާލޭގެ ހެނވޭރު އަބަދަށްފެހި މަގުގައި ހިނގާ އެތައް ބައެއްގެ ގެތަކުގައި ރޯވެ އެތައް ދިވެހިންނެއް ހާލުގައި ޖެހުނު ބިރުވެރި ދުވަހެކެވެ. އެ ދުވަހު ސިފައިނެގެ ތެރެއިން އަލިފާން ނިއްވުމާއި އަލިފާން ރޯވެފައިވާ ގެތަކަށް ވަދެ މީހުން ސަލާމަތް ކުރުމަށް ސިފައިން ކުރި ބުރަ މަސައްކަތް މިރޭ ބޭއްވި ނަސްރުގެ ދުވަހުގެ ޖަލްސާގައި ވަނީ ފާހަގަކޮށްފައެވެ.
ހެންވޭރު އަލިފާނުގެ ހާދިސާގައި ހަރަކާތްތެރިވި ސިފައިންގެ ތެރެއިން، ފުރާނަ ސަލާމަތް ކުރުމުގެ މެޑަލް 9 ސިފައިންނަށް އެރުވި އިރު 11 ސިފައިންނަށް ވަނީ އެ ހާދިސާގައި ކުރި ހިތްވަރު ފާހަގަކޮށް ކުލަ ހަވާލުކޮށްފައެވެ. ކުލަ އާއި މެޑަލް ސިފައިންނަށް ހާވާލު ކޮށްދެއްވީ ސިފައިންގެ އެންމެ މަތީ ވެރިޔާ އަދި ރައީސް އިބްރާހިމް މުހައްމަދު ސޯލިހެވެ.
އެމްއެންޑީއެފްއިން ބުނި ގޮތުގައި، ފުރާނަ ސަލާމަތް ކުރުމުގެ ރިހި މެޑަލް ދެނީ އަމިއްލަ ނަފުސަށް ލިބިދާނެ ގެއްލުމަކަށް ބެލުމެއް ނެތި، އިންސާނެއްގެ ފުރާނަ ސަލާމަތް ކުރުމަށް ނުވަތަ އިންސާނެއްގެ ފުރާނަ ސަލާމަތް ކުރުމަށް މަސައްކަތް ކުރި މިންވަރު ބަލައެވެ.
ފުރާނަ ސަލާމަތް ކުރުމުގެ ރިހި މެޑަލް ލިބުނު 8 ސިފައިން:
- ސާޖަންޓް އަހްމަދު ސައީދު
- ސާޖަންޓް މަހުފޫޒް އަބްދުއްރަޝީދު
- ސާޖަންޓް އަލީ ރިޒްވީން
- ސާޖަންޓް އާދަމް ފަޒީލް
- ސާޖަންޓް ހުސައިން އަންވަރު
- ކޯޕްރަލް އަހްމަރު އަނަސް ޒަކީ
- ކޯޕްރަލް އަހްމަދު ހިޝާމް
- ކޯޕްރަލް ޝަހުދާން ނަސީމް
- ޕްރައިވެޓް އިސްމާއިލް ރިހުޝާން
ހިތްވަރުގަދަ ކަމުގެ ކުލަ ލިބުނު 11 ސިފައިން:
- ސްޓާފް ސާޖަންޓް މުހައްމަދު ވާސިފް
- ސާޖަންޓް ޝައުކަތު އަމީން
- ސާޖަންޓް ހަސަން ތައުފީގު
- ކޯޕްރަލް އަބްދުﷲ ރަޝީދު
- ކޯޕްރަލް އިބްރާހިމް ނާޒިފް
- ކޯޕްރަލް އަބްދުއްރަޝީދު މުހައްމަދު
- ކޯޕްރަލް އަހްމަދު ރަޝީދު
- ލާންސް ކޯޕްރަލް ނަސްރުﷲ އަލީ
- ލާންސް ކޯޕްރަލް އަދުނާން އަބްދުއްރަހީމް
- ޕްރައިވެޓް އިބްރާހިމް އިމްތިޔާޒް
- ޕްރައިވެޓް އިސްމާއިލް ރިހުޝާން
އަލިފާނުގެ އެ ބޮޑު ހާދިސާގައި ދިވެހި ސިފައިން ދެއްކި ހިތްވަރާ ސާބިތުކަން ރައީސް ސޯލިހު ފާހަގަ ކުރައްވަމުން ވިދާޅުވީ، އަލިފާނުގެ ހާދިސާގައި ސިފައިން ހިތްވަރު ނުދެއްކި ނަމަ އެތައް ބައެއްގެ ފުރާނަ ގެއްލިގެން ދިޔައީސް ކަމަށެވެ.
މިރޭގެ ރަސްމިއްޔާތުގައި ވަނީ އަލަށް ސިފައިންގެ ވަޒީފާއާ ގުޅުނު މީހުން ހުވާކޮށްފައެވެ. އެ ސިފައިންނާ މުޚާތަބުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ގާނޫނު އަސާސީ ދިފާއުކުރުމާއި، އިސްލާމްދީނާ ރާއްޖެ ދިފާއުކުރުން އަދި ދުޝްމަނުންގެ ކިބައިން ގައުމާއި ރައްޔިތުން ސަލާމަތްކޮށް ފުރާނައިން ގުރުބާންވާން ކުރި ހުވަޔާއެކު ދައުލަތަށް ޚިދުމަތް ކުރުމުގައި ދެމި ތިބުމަށެވެ. އަދި ހުވާގެ މަތީގައި ދެމިތިބިކަން އަމަލާ ބަހުން އަބަދުވެސް ދައްްކަމުން ގެންދިއުމަށް ނަސޭހަތްތެރިވެ ވަޑައިގެންނެވި އެވެ.
