ޓެރަރިޒަމަށް ފަންޑުކުރުމުގެ ކުށުގައި ސިންގަޕޫރުގައި ފުރަތަމަ ފަހަރަށް އެގައުމުގެ މީޙަކު ޖަލަށް ލައިފިއެވެ.
މިމީހާގެ މައްޗަށް ދައުވާކޮށްފައިވަނީ ހައްދުފަހަނައަޅާފައިވާ މީހަކަށް ފައިސާ ފޮނުވި ކަމުގެ ކުށުގައެވެ.
ސިންގަޕޫރަކީ ޓެރަރިސްޓުންގެ އަމާޒުފަތްގަނޑަކަށް ވަމުން އަންނަ ކަމަށް އެގައުމުގެ ލީޑަރުން ބުނަމުންދާ މިދަނޑިވަޅުގައި، ދީނީ ފިކުރުގައި ހައްދުފަހަނައަޅާ ދިއުމަށް އެއްބާރުލުން ދިނުމުގެ ކުށުގައި މިފަހަކަށް އައިސް ސިންގަޕޫރުން ވަނީ ގިނަ އަދަދެއްގެ ބަޔަކު ހައްޔަރުވެސް ކޮށްފައެވެ.
ޓެރަރިޒަމަށް ފަންޑުކުރުމުގެ ކުށުގައި ސިންގަޕޫރުން ފުރަތަމަ ފަހަރަށް ޖަލަށް ލާފައިވަނީ ޖެމެއިކާގައި ހުރި ޝައިހު ޢަބްދުﷲ އަލް-ފައިސަލް ނަމަކަށް ކިއާ މީހަކަށް 840 ޑޮލަރު ފޮނުވި ސިންގަޕޫރުގެ ރައްޔިތެއް ކަމަށްވާ އަހުމަދު ހުސައިން ޢަބްދުލްޤާދިރު ޝައިހު އުސްމާން ނަމަކަށް ކިއާ މީހެކެވެ.
ހުސައިންއާއި ފައިސަލްގެ ގުޅުން ފެށިފައިވަނީ ހައްދުފަހަނައަޅާފައިވާ ހަނގުރާމަވެރި އައިސިސް ޖަމާއަތަށް އެއްބާރުލުން ހޯދުމަށް ޔޫޓިއުބަށް ފައިސަލް އަޕްލޯޑްކޮށްފައި ހުރި ވީޑިއޯތަކެއް ބަލައިގެންނެވެ.
ފައިސަލްއަކީ ޣައިރު މުސްލިމުން މަރަން ގޮވުމުގެ ކުށުގައި 2003 ވަނަ އަހަރު އިނގިރޭސިވިލާތުން 9 އަހަރުގެ ޖަލު ހުކުމެއް އިއްވާފައި ހުރި މީހެކެވެ. ނަމަވެސް ހުކުމުގެ 4 އަހަރު ފުރިހަމަ ކުރުމަށްފަހު އޭނާވަނީ އުފަން ވަޒަންކަމަށްވާ ޖެމެއިކާއަށް ފޮނުވާލާފައެވެ.
ސިންގަޕޫރުގެ ކަމާބެހޭ ފަރާތްތަކުން ހުސައިން ހައްޔަރުކުރީ 2018 ވަނަ އަހަރުގެ ޖުލައި މަހުއެވެ. އެއީ ޝަރިޔަތަކާ ނުލާ 2 އަހަރު ދުވަހަށް މީހަކު ބަންދުގައި ބެހެއްޓުމަށް ކަމާ ބެހޭ ފަރާތްތަކަށް ބާރުދޭ ދާހިލީ ސަލާމަތުގެ ގާނޫނުގެ ދަށުންނެވެ.
