މީހެއްގެ ޖިސްމާނީ ހަށިގަނޑުގެ ބޭރުފުށުން ސާފުތާހިރުވާ އުސޫލުން، އެމީހެއްގެ އިހުސާސްތަކާ ޖަޒުބާތުތައްވެސް ސާފުތާހިރު ކުރުމަކީ، އިންތިހާ މާޔޫސްކަން ނުވަތަ ޑިޕްރެޝަންއާ ދުރުކޮށްދޭނެ ކަމެއް ކަމަށް ބޮލީވުޑްގެ ސުޕާސްޓާ އާމިރު ހާން ބުނެފިއެވެ.
ބައިނަލްއަގުވާމީ ފެންވަރުގައި ފާހަގަކުރަމުންދާ ނަފްސާނީ ދުޅަހެޔޮކަމަށް މީހުން ހޭލުންތެރި ކުރުވުމުގެ ހަފުތާއާއި ގުޅިގެން އާންމުކުރި ޕޯސްޓެއްގައި އާމިރު ހާން ބުނީ، ކަންކަމަށް ހޭލުންތެރިވެ ހުރުމާ، އުނދަގޫ ކުރާ އިހުސާސްތަކާ ޖަޒުބާތުތައް އެހެން މީހަކާ ހިއްސާކުރުމަކީ ނުތަނަވަސްކަން ފިލާދާ ކަމެއްކަމަށެވެ. މީގެ އިތުރުން ޖިސްމާނީ ހެލިފެލިވުމާ ކަސްރަތަކީވެސް މިފަދަ ނުތަނަވަސްކަން ފިލުވާލާ ކަމެއްކަން އާމިރު ވަނީ އޭނާގެ ފޭނުންނަށް ހަނދާންކޮށްދީފައެވެ.
މިފަދަ ނުތަނަވަސް އިހުސާސްތަކާ ޖަޒުބާތުތަކަށް ދުރާލާ ރިއާޔަތްކޮށް ހައްލު ހޯދުމަކީ ޑިޕްރެޝަންއާއި ދުރުކޮށްދޭނެ ކަމެއްކަމަށާ ކޮންމެ ފަދަ މީހަކީވެސް ޑިޕްރެޝަންގެ ޝިކާރައަކަށް ވެދާނެ މީހެއްކަމަށް އާމިރު ހާންގެ ޕޯސްޓްގައި ވަނީ ބުނެފައެވެ.
ބޮލީވުޑް ސިނާތަށް ބަލާއިރު ގިނަ އަދަދެއްގެ ތަރިން މިފަހަކަށް އައިސް ދަނީ، އެމީހުންނަށް ކުރިމަތިލާންޖެހުނު ނަފްސާނީ ގޮންޖެހުންތަކުގެ ވާހަކަތައް އެމީހުންގެ ފޭނުންނާ ހިއްސާކޮށް، އެފަދަ ތަކުލީފުތައް އުފުލަމުންދާ މީހުންނަށް ހިތްވަރު ދީ، އެނޫން މީހުން އެކަމަށް ހޭލުންތެރިކުރުވުމަށް އަޑުއުފުލަމުންނެވެ.
