މަޝްހޫރު "ބޮންޑް" ފިލްމް ފްރެންޗައިޒްގައި އޭނާ އަދާކުރަމުންދިޔަ 'ޑަބަލް އޯ ސެވަން' ނުވަތަ 'ޖޭމްސް ބޮންޑް'ގެ ކްރެކްޓާއަށް، ޑެނިއަލް ކްރެއިގް އަލްވަދާއު ކިޔައިފިއެވެ.
ބޮންޑް ފްރެންޗައިޒްގެ 25 ވަނަ ފިލްމް "ނޯ ޓައިމް ޓު ޑައި"ގެ ޝޫޓިންގްގެ މަސައްކަތްތައް ނިންމާލުމަށްފަހު ކުރިއަށް ގެންދިޔަ އިވެންޓެއްގައި ކްރެއިގްވަނީ އެ ފްރެންޗައިޒްގައި އޭނާ ކުރި މަސައްކަތްތަކާ ގުޅިގެން ޖަޒުބާތުން ފުރިގެންވި ވާހަކަތަކެއް ދައްކާފައެވެ. އަދި އޭނާއާއިއެކު އެ ފިލްމުތަކުގައި މަސައްކަތްކުރި ހުރިހާ އެންމަނަށްވެސް ކްރެއިގްވަނީ ހާއްސަ ޝުކުރެއް އަދާކޮށްފައެވެ.
ކެރީ ފުކުނާގާ ޑައިރެކްޓްކުރާ ބޮންޑް ފްރެންޗައިޒްގެ 25 ވަނަ ފިލްމުގައި ފެނިގެންދަނީ ރިޓާޔާކޮށްފައިހުރި ބޮންޑް އަލުން އަނބުރާ މަސައްކަތުގެ މާހައުލަށް ނިކުމެ، މައްސަލަ ހައްލުކުރަން އުޅޭ މަންޒަރެވެ. ވަގަށް ނަގާފައިވާ ސައިންޓިސްޓެއް ސަލާމަތްކުރުމަށް ކުރަމުންދާ މަސައްކަތްތައް ދައްކުވާދޭ މި ފިލްމުން ކްރިސްޓަފާ ވޯލްޓްޒްވެސް ބޮންޑްގެ ދުޝްމަނުގެ ރޯލުން ފެނިގެންދާނެއެވެ. މީގެ އިތުރުން އަދުގެ ގިނަ ޒުވާނުންތަކެއްގެ ހިތް އަތުލާފައިވާ ރާމީ މަލިކްވެސް މިފަހަރުގެ ބޮންޑް ފިލްމުން ފެނިގެންދާނެއެވެ.
ބޮންޑް ފްރެންޗައިޒްގެ 25 ވަނަ ފިލްމް ރިލީޒް ކުރުމަށް ހަމަޖެހިފައިވަނީ 2020 ވަނަ އަހަރު އެޕްރިލް މަހުގެ 8 ވަނަ ދުވަހުއެވެ.
