މިޔަންމާ ދޫކޮށް ރެފިއުޖީންގެ ގޮތުގައި ހިޖުރަކޮށްފައިވާ ރޯހިންޏާ ދަރިކޮޅުގެ މީހުންގެ ކާރިސާއަކީ އެމީހުން ދިރިއުޅެމުންދާ ކޭމްޕުތަކުގެ ތެރޭގައި އޮތް ކާރިސާއެއް ނޫންކަމަށާ، ކޭމްޕުތަކުން ބޭރުވެ ސަރަހައްދީ ނުރައްކަލަކަށް އެކަން ބަދަލުވެފައިވާކަމަށް ބަންގްލަދޭޝްގެ ބޮޑުވަޒީރު ޝައިހު ހަސީނާ ވިދާޅުވެއްޖެއެވެ.
އދގެ 74 ވަނަ އާންމު މަޖިލީހުގެ އިސްވެރިންގެ ބައްދަލުވުމުގައި ތަގުރީރުކުރައްވަމުން ހަސީނާ ވިދާޅުވީ، މިމައްސަލައިގެ ހާލަތު ވަރަށް ރަނގަޅަށް ބައިނަލްއަގުވާމީ މުޖުތަމައަށް އެނގެންޖެހޭނެ ކަމަށެވެ. ބަންގްލަދޭޝްއިން މިހާރު އުފުލަމުންދާ ތަކުލީފުތަކަކީ މިޔަންމާއިން އުފެއްދި ތަކުލީފުތަކެއް ކަމަށް ހަސީނާ ވަނީ ސިފަކުރައްވާފައެވެ.
މިމޭރުމުން ވާހަކަފުޅު ދައްކަވަމުން ހަސީނާ ވިދާޅުވީ، ބަންގްލަދޭޝްގައި ތިބި ރޯހިންޏާ ރެފިއުޖީން އަނބުރާ މިޔަންމާއަށް ފޮނުވާލުމާ ގުޅޭ ގޮތުން މިޔަންމާއެކުގެ މަސައްކަތްކުރަމުންދާނެ ކަމަށެވެ. އެގޮތުން ރައްކާތެރި ކަމާއެކު މިޔަންމާއަށް ދެވޭނެ ކަން ކަށަވަރުވުމަށް ގޮވާލާ ގަރާރެއް، ބަންގްލަދޭޝްއިންވަނީ އދއަށް ހުށަހަޅާފައެވެ.
ހަސީނާ ވިދާޅުވީ ރޯހިންޏާ މައްސަލައަށް އޮތް ހަމައެކަނި ހައްލަކީ ރެފިއުޖީން އަމިއްލަ އިހުތިޔާރުގައި، ސަލާމަތްތެރިކަމާ އަބުރުވެރިކަމާއެކު މިޔަންމާއަށް އެނބުރިދިއުން ކަމަށެވެ.
މިޔަންމާގެ ރާހީން ސްޓޭޓްގައި އެގައުމުގެ އަސްކަރިއްޔާއިން 2017 ވަނަ އަހަރުގެ އޯގަސްޓް މަހުގެ ތެރޭގައި ހިންގި ގަތުލުއާންމުން ސަލާމަތްވުމަށް 7 ލައްކައަށްވުރެ ގިނަ ރެފިއުޖީން ބަންގްލަދޭޝްއަށް އެތެރެވިއިރު އޭގެ ކުރިން އެކި ފަހަރު މަތިން ބަންގްލަދޭޝްއަށް ހިޖުރަކުރި މިޔަންމާ ރެފިއުޖީންނާއެކު، ބަންގްލަދޭޝްގައި ތިބި މިޔަންމާއަށް ނިސްބަތްވާ ރެފިއުޖީންގެ އަދަދު މިލިއަނަކަށް އަރައެވެ. ބަންގްލަދޭޝްގައި ތިބި މިޔަންމާގެ ރެފިއުޖީން އަނބުރާ މިޔަންމާއަށް ފޮނުވާލުމަށް މިހާތަނަށް ކުރި އެއްވެސް މަސައްކަތެއް އަދި ވަނީ ކާމިޔާބުވާގޮތް ނުވެފައެވެ.
