ހުކުރު ދުވަހުގެ ރޭ ހިނގި އަލިފާނުގެ ހާދިސާއަށް ފަހު މާލެއަށް ވެހުނު ވާރެއަކީ އެސިޑް ވާރޭ ނޫން ކަމަށް ނިންމައިފިއެވެ.
ހެލްތް މިނިސްޓްރީގެ ދަށުން ހިންގާ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނީ، މިދިޔަ ހުކުރުދުވަހު އަބަދަށްފެހި މަގުގައި ހުރި ކެމިކަލް ގުދަންތަކެއްގައި ރޯވެ ހިނގި އަލިފާނުގެ ހާދިސާއަށް ފަހު މާލެއަށް ވާރޭ ވެހެން ފެށުމުން، އެ ވާރޭގައި އެސިޑްގެ އަސަރު ހުންނާނެ ކަމަށް ތުހުމަތު ކުރެވޭތީ، އެ ވާރޭގެ ސާމްޕަލް ނަގާ އެ އޮތޯރިޓީން ޓެސްޓު ކޮށްފައިވާ ކަމަށެވެ.
އެމްއެފްޑީއޭ އިން ބުނީ، ވާރޭގައި އެސިޑްގެ އަސަރު ހުންނާނެ ކަމަށް ތުހުމަތު ކުރެވޭތީ، އެ ވާރޭގެ ސާމްޕަލް ނަގާ އިއްޔެ ޓެސްޓު ކުރުމުން، އެ ވާރޭގައި އެސިޑްގެ އަސަރުގެ އެކުލެވިގެން ނުވާކަން ހާމަވެފައިވާ ކަމަށެވެ.
އެމްއެފްޑީއޭން އިން މި ވާރޭގައި އެށީދްގެ އަސަރު ނެތް ކަމަށް ނިންމާފައިވާއިރު، ވާރޭގައި އެސިޑްގެ އަސަރު ހުރުން އެކަށީގެންވާތީ، ވާރޭއިން ތެމުމުގެ ސަބަބުން ހަންގަނޑު ހިރުވާނަމަ އަވަހަށް ޑޮކްޓަރެއްގެ ލަފާ ހޯދުން މުހިންމު ކަމަށް ބުނެ އާންމުންގެ ތެރޭގައި ދަނީ ހޭލުންތެރިކަމުގެ މެސެޖެއް ވެސް ދައުރުވަމުންނެވެ.
މިދިޔަ ހުކުރު ދުވަހުގެ ރޭ އިރާކޮޅު ހެންވޭރުގައި ހިނގި އަލިފާނުގެ ހާދިސާ ހިނގީ ކެމިކަލް ގުދަނެއްގައި ރޯވެގެންނެވެ. އެ ހާދިސާގައި 6 ގެއަކާއި 4 ކެމިކަލް ގުދަން އަނދާ އާޅިއަށް ވެފައިވާއިރު، 80 އަށް ވުރެ ގިނަ އާއިލާ ވަނީ ހާލުގައި ޖެހިފައެވެ. އަދި އެ އާއިލާތަަކށް ވަގުތީ ބޯހިޔާ ވެހިކަމާއި އެންމއެންޑީއެފާއި، ފުލުހުންނާއި، ސިޓީ ކައުންސިލްގެ އިތުރުން ޑިޒާސްޓާމެނޭޖްމަންޓް އަދި އާންމުންގެ ފަރާތުން އެތައް އެހީތެރިކަމެއް ވަނީ ފޯރުކޮށްދީފައެވެ.
ރޯވި އިމާރާތްތަކުގެ އަލިފާނގަނޑު ކޮންޓްރޯލް ކުރެވުނީ ހަތަރު ގަޑިއިރަށް ވުރެ ގިނަ ވަގުތުގެ ބުރަ މަސައްކަތުންނެވެ. މި ހާދިސާގައި ތ. ބުރުނީއަށް އުފަން 46 އަހަރުގެ އައިޝަތު ޝައުނާ ވަނީ ނިޔާވެފައެވެ. ޝައުނާ ނިޔާވީ އަލިފާނުގެ ހާދިސާ ހިނގި ގެއެއްގައި ތާށިވެ ނުނިކުމެ ވުމުގެ ސަބަބުންނެވެ.
