ބަހާމާސްއާއި އެމެރިކާގެ ފްލޮރިޑާއަށް ކުރިމަތިވެފައިވާ ތޫފާން ޑޯރިއަން، ކެޓަގަރީ 4 ތޫފާނެއްގެ ދަރަޖައަށް ވަރުގަދަ ވެފައިވާކަމަށް ތޫފާންތަކާ ބެހޭ އެމެރިކާގެ އިދާރާ (އެން.އެޗް.ސީ)އިން އިންޒާރުކޮށްފިއެވެ.
ތޫފާން ޑޯރިއަންގައި، ގަޑިއަކު ގާތްގަނޑަކަށް 130 މޭލު ބާރު މިނުގައި ވައިޖެހޭނެކަމަށް ލަފާކުރެވެއެވެ.
ބަހާމާސްގެ ހުޅަނގު އުތުރުން ދަތުރުކުރަމުންދާއިރު ތޫފާނުގެ ބާރު އިތުރަށް ގަދަވާނެ ކަމަށާއި، މިމަގުން ދަތުރުކުރަމުން ގޮސް އެމެރިކާގެ ފްލޮރިޑާއަށް ތޫފާން އަރާނެ ކަމަށް ލަފާކުރެވެނީ އަންނަ ހަފުތާގެ ކުރީކޮޅު ކަމަށް މައުލޫމާތު ލިބެއެވެ.
ތޫފާނާ ގުޅިގެން ފްލޮރިޑާގައި ކުށްލި ހާލަތު އިއުލާންކޮށްފައިވާ އިރު، އާންމުންދަނީ ތޫފާން އެންމެ ގަދަވާނެކަމަށް ލަފާކުރާ ދުވަސްވަރަށް ތައްޔާރުވަމުންނެވެ. އެގޮތުން އެކަށީގެންވާ މިންވަރެއްގެ ކާބޯތަކެއްޗާ، ބޭސްފަރުވާގެ ސާމާނާ އެނޫންވެސް ގޮތްގޮތުން ސަލާމަތާ ރައްކާތެރިކަމަށް ބޭނުންވާ ސާމާނު ދުރާލާ ގަނެ، ރައްކާކުރަމުންދާ ކަމަށް ޚަބަރު ލިބެއެވެ.
އެން.އެޗް.ސީއިން ވަނީ މި ތޫފާނަކީ ފުރާނައަށް ނުރައްކާވާ ދަރަޖައިގެ ތޫފާނެއް ކަމަށް އިންޒާރުކޮށްފައެވެ.
