2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާއަށް ދިން ޓެރަރިސްޓް ހަމަލާގެ މޭސްތިރީގެ ގޮތުގައި ތުހުމަތު ކުރަމުން އަންނަ ޚާލިދު ޝައިހު މުޙައްމަދުގެ މައްޗަށް ޝަރީއަތް ހިންގާ، އޭނާގެ މައްޗަށް ހުކުމް އިއްވާނެ ތާރީހު ކަނޑައަޅައިފިއެވެ.

ޚާލިދު ޝައިހު މުޙައްމަދުގެ މައްޗަށް ހުކުމް އިއްވުމަށް ޝަރީއަތް ފަށާ ތާރީހު ކަމުގައި ކަނޑައަޅާފައިވަނީ 2021 ވަނަ އަހަރުގެ ޖަނަވަރީ މަހުގެ 11 ވަނަ ދުވަހެވެ. މި ޝަރީއަތް ކުރިއަށް ގެންދިއުމަށް ތާވަލުކޮށްފައިވަނީ ގުއަންޓަނަމޯ ބޭގެ ކޯޓެއްގައެވެ. ޚާލިދު ޝައިހު މުޙައްމަދާއެކު އިތުރު 4 މީހެއްގެ މައްޗަށް މި ޝަރީއަތް ކުރިއަށްގެންދާނެ ކަމަށް މައުލޫމާތު ލިބެއެވެ.

މި 5 މީހުންނާ ދެކޮޅަށް ދައުވާ ކުރަމުންދަނީ ހަނގުރާމައިގެ ޖަރީމާ ހިންގުމާ، ޓެރަރިޒަމްގެ އިތުރުން، ގާތްގަނޑަކަށް 3000 އަކަށް މީހުންގެ މަރުގެ މައްސަލާގައެވެ. މިއީ ނިއު ޔޯކްއާއި، ވޮޝިންގްޓަން އަދި ޕެންސިލްވޭނިއާއަށް މީގެ 20 އަހަރުކުރިން އަމާޒުވި ވަރުގަދަ ޓެރަރިސްޓް ހަމަލާތަކާ ގުޅިގެން ޝަރީއަތް ކުރާ ފުރަތަމަ 5 މީހުންނެވެ.

މި 5 މީހުންގެ މައްޗަށް ކުށް ސާބިތުވެއްޖެނަމަ މިއިން ކޮންމެ މީހެއްގެ މައްޗަށްވެސް އަންނާނީ މަރުގެ ހުކުމެކެވެ.

އެމެރިކާގެ ކަމާބެހޭ ފަރާތްތަކުން ޚާލިދު ޝައިހު މުޙައްމަދު ހައްޔަރުކުރީ 2003 ވަނަ އަހަރު ޕާކިސްތާނުންނެވެ. އެއަށްފަހު އޭނާވަނީ ކިއުބާގައި ހުންނަ ގުއަންޓަނަމޯ ބޭ ޖަލަށް ބަދަލުކޮށްފައެވެ. ޚާލިދު ޝައިހު މުޙައްމަދާ، އަނެއް 4 މީހުންގެ މައްޗަށް ޝަރީއަތް ހިންގުމަށް ކުރި މަސައްކަތްތައް އެކި ސަބަބުތަކާ ހެދި މިހާތަނަށް ވަނީ ފަސްކުރެވިފައެވެ.

ދުނިޔެ ޓެރަރިޒަމް