ރާއްޖޭގެ ސިއްހީ ދާއިރާގެ ހިންގުމުގެ ކަންކަން ހަރުދަނާ ކުރުމާ ބެހޭ ހެލްތް މެނޭޖްމަންޓް އެބިލިޓީ ފޯ މޯލްޑިވިއަން އޮފިޝަލްސް ސެމިނާ ޗައިނާގައި ފަށައިފިއެވެ.
މި ސެމިނާގައި ރާއްޖޭގެ ސިއްހީ ދާއިރާއި ގުޅުން ހުރި ސިޔާސަތުތަކާއި ގާނޫނުތައް ތަންފީޒު ކުރުމުގައި ހުރި މައްސަލަތައް ހައްލުކުރުމުގައި ކުރެވި ދާނެ މަސައްކަތްތަކާއި، މެނޭޖްމަންޓާއި ޓެކްނިކަލް ފެންވަރުގައި ފޯރު ކޮށްދެވޭ ހިދުމަތްތައް މިހާރަށް ވުރެ ފުޅާކުރެވިދާނެ ގޮތްތަކާ ގުޅޭގޮތުން ޗައިނާގެ ފަންނީ ތަޖުރިބާކާރުންގެ ހިޔާލާ މަޝްވަރާ ބައިވެރިންނާ ހިއްސާ ކުރުމަށް ވަނީ ހަމަޖެހިފައެވެ. އަދި ސިއްހީ ދާއިރާގައި މަސައްކަތް ކުރާ މުވައްޒަފުންނަށް ބޭނުންވާ ތަފާތު ޕްރޮފެޝަނަލް ސްކިލްސްތަކާއި، ހިންގުމުގެ ދާއިރާ ހަރުދަނާކޮށް، ރާއްޖޭގެ ސިއްހީ ނިޒާމު ހަރުދަނާކުރުމަށް އެޅިދާނެ ފިޔަވަޅުތަކާ ގުޅޭގޮތުން ވެސް މަޝްވަރާ ކުރުމަށް ވަނީ ހަމަޖެހިފައެވެ.
އެގޮތުން ސިއްހީ ދާއިރާއަށް އަންނަމުންދާ ޒަމާނީ ބަދަލުތަކާ އެކު ބައިނަލްއަގާވާމީ ގޮތުން އަމަލު ކުރަމުން ދާ ތަފާތު ފްރޭމްވޯކްތަކާ ގުޅޭގޮތުން މަޝްވަރާ ކުރުމާއި، އާއިލާ ރޭވުމާއި، ދަރިމައިވުމުގެ ސިއްހަތުގެ ކަންކަން ޕްރޮމޯޓްކޮށް ހަރުދަނާ ކުރުމަށް ޗައިނާގައި އެކުލަވާލެވި ފައިވާ ސިޔާސަތުތަކާއި އަމަލު ކުރަމުން ދާ ގަވާއިދުތަކާއި ގާނޫނުތަކާއި ގުޅޭގޮތުން މި ސެމިނާގެ ތެރޭގައި ބައިވެރިންނަށް މައުލޫމާތު ދެވިގެން ދާނެ ކަމަށް ހެލްތް މިނިސްޓްރީން ބުނެއެވެ.
މީގެ އިތުރުން މި ސެމިނާގެ ތެރެއިން ޗައިނާގެ ޕަބްލިކް ހެލްތް ސިސްޓަމްގެ ކަންކަން ކުރިއަށް ދާގޮތް އަމަލީގޮތުން ތަޖުރިބާ ކޮށްލުމަށް ހާއްސަ ސްޓަޑީ ޓުއާއެއްވެސް ކުރިއަށް ދާނެ ކަމަށް އެ މިނިސްޓްރީން ބުނެއެވެ.
މި ސެމިނާގައި ހެލްތް މިނިސްޓްރީގެ ސިޔާސީ މަގާމު ތަކުގައި ތިއްބެވި ފަސް ބޭފުޅަކާއި، އެ މިނިސްޓްރީގެ ސިވިލް ސާވަންޓުންގެ ނުވަ މުވައްޒަފުންނާއި، އަތޮޅުތެރޭގެ ރީޖަނަލް ޕޯސްޓްތަކުގައި މަސައްކަތް ކުރާ ފަސް މުވައްޒަފުން ހިމެނޭހެން ޖުމްލަ 19 އޮފިޝަލުން ބައިވެރިވެއެވެ.
