ބަންގްލަދޭޝްގައި ދިރިއުޅެމުން ދާ ރޯހިންޏާ ދަރިކޮޅުގެ ރެފިއުޖީންނާ މެދު އެގައުމުން ގެންގުޅެމުން އައި އުސޫލުތައް އިތުރަށް ހަރުކަށި ކުރަމުން ދާނެ ކަމަށް ބަންގްލަދޭޝްއިން ބުނެފިއެވެ.
ބަންގްލަދޭޝްއާއި އަވަށްޓެރި މިޔަންމާގެ އަސްކަރިއްޔާއިން ހިންގި ގަތުލުއާންމާ ޖަރީމާ ތަކުން ސަލާމަތްވުމަށް 2017 ވަނަ އަހަރުގެ އޯގަސްޓް މަހުން ފެށިގެން 7 ލައްކައަށް ވުރެ ގިނަ ރެފިއުޖީން ވަނީ ބަންގްލަދޭޝްއަށް އެތެރެވެ އެގައުމުގައި ދިރިއުޅެން ފަށާފައެވެ.
ބަންގްލަދޭޝްގެ ހާރިޖީވަޒީރު ޢަބްދުލް މޫމިން ވިދާޅުވީ، ރެފިއުޖީންގެ ސަބަބުން އިގުތިސޯދީ ބޮޑު ތަކުލީފެއް އުފުލަން ޖެހިފައި ވާކަމަށެވެ. ނަމަވެސް ރޯހިންޏާ ރެފިއުޖީންނާ މެދު ބަންގްލަދޭޝްއިން އަމަލު ކުރަމުން ދާ އުސޫލުތައް ހަރުކަށި ކުރަނީ ކޮން ގޮތަކުން ކަމެއް ވަޒީރު ތަފްސީލު ކޮށްދެއްވާފައެއް ނުވެއެވެ.
ބަންގްލަދޭޝްގައި ތިބި ރޯހިންޏާ ރެފިއުޖީން މިޔަންމާއަށް އަނބުރާ ފޮނުވާލުމަށް 2 އަހަރު ދުވަހު ކުރި މަސައްކަތްވެސް އަދި ވަނީ ކާމިޔާބު ވާ ގޮތް ނުވެފައެވެ. އެންމެ ފަހުގެ މަޝްރޫއުގެ ދަށުން 3000 އަށްވުރެ ގިނަ ރެފިއުޖީން މިދިޔަ ބުރާސްފަތި ދުވަހު މިޔަންމާއަށް ފޮނުވާލަން ހަމަޖެހުނު ނަމަވެސް، އެންމެ ފަހު ވަގުތު، އެނބުރި މިޔަންމާއަށް ދިއުމަށް އެއްވެސް ރެފިއުޖީއަކު އެއްބަހެއް ނުވިއެވެ.
ބަންގްލަދޭޝްގެ ހާރިޖީ ވަޒީރު ވަނީ، ރެފިއުޖީން އެނބުރި ގައުމަށް ނުދިއުމަށް އެމީހުންނަށް ހިތްވަރު ދެމުންދަނީ ސަރުކާރު ހިއްސާނުވާ އެންޖީއޯތަކަކުން ކަމަށް ތުހުމަތު ކުރައްވާފައެވެ.
މިޔަންމާއިން ބުނާ ގޮތުގައި ރޯހިންޏާ ދަރިކޮޅުގެ މީހުންނަކީ ބަންގްލަދޭޝްއަށް ނިސްބަތްވާ ބައެކެވެ. ނަމަވެސް މިކަން ގަބޫލުކުރުމަށް ބަންގްލަދޭޝްއިން އިންކާރު ކުރެއެވެ. ނަތީޖާއަކަށް ވެފައި ވަނީ އެއްވެސް ގައުމަކުން ދާއިމީ ރަށްވެހިކަން ލިބިފައި ނެތް ބަޔަކަށް، ރޯހިންޏާ ދަރިކޮޅު މީހުން ވެގެން ދިއުމެވެ.
