ފައިދާ ހިއްސާކުރުމުގެ މައްސަލައެއްގައި މާވެލްއަށް "ސްޕައިޑާމޭން" ގެއްލެން އުޅޭކަމުގެ ޚަބަރުތަކެއް ފެންމަތިވެއްޖެއެވެ.
ލިބެމުންދާ މީޑިއާ ރިޕޯޓްތަކަށް ބަލާއިރު، "ސްޕައިޑާމޭން" އާއެކު މާވެލް ސްޓޫޑިއޯޒްއިން ހަދާފައިވާ އެއްބަސްވުން އުވާލުމާ ގާތަށް މައްސަލަ ވަނީ ހޫނުވެފައެވެ.
"ސްޕައިޑާމޭން" ލައިވް އެކްޝަން ރީމޭކްގެ އިތުރު ފިލްމެއް މާވެލް ސްޓޫޑިއޯޒްގެ ދިދައިގެ ދަށުން ދެން ނުފެނުމުގެ ފުރުސަތު އޮތްއިރު، މާވެލްގެ އެއްވެސް ފިލްމެއްގައި "ސްޕައިޑާމޭން"ގެ ކެރެކްޓާވެސް ނުފެނުން ގާތްކަމަށް، އެކަމާ ބެހޭ މައުލޫމާތު އެނގޭ މަސްދަރަކުން ވަނީ ބުނެފައެވެ.
1985 ވަނަ އަހަރުން ފެށިގެން "ސްޕައިޑާމޭން" ކެރެކްޓާގެ ރައިޓްސް އޮތީ ސޮނީ ކުންފުނީގެ އަތުގައެވެ. އެއަށްފަހު ޑިޒްނީއާއި މާވެލް ސްޓިޑިއޯޒްއާއިއެކު 2015 ވަނަ އަހަރު އެއްބަސްވުމެއް ހަދާ، މާވެލް ސިނެމެޓިކް ޔުނިވާޒްގެ އުފެއްދުންތައް ކަމަށްވާ "އެވެންޖާޒް: އެންޑްގޭމް" ފަދަ ފިލްމްތަކުގައި "ސްޕައިޑާމޭން" ކެރެކްޓާ ބޭނުންކުރުމުގެ މިނިވަންކަން ދެވުނެވެ.
މި އެއްބަސްވުމުގައި މައްސަލަ ޖެހިގެން އުޅެނީ "ސްޕައިޑާމޭން" ކެރެކްޓާ ބޭނުންކޮށްގެން އުފައްދާ ފިލްމުތަކަށް ލިބޭ ފައިދާގެ 50 ޕަސެންޓް ޑިޒްނީ ކުންފުންޏަށްވެސް ލިބެންޖެހޭނެކަމަށް އެކުންފުނިން ވަކާލާތު ކުރަން ފެށުމުންނެވެ. މައުލޫމާތު ލިބޭ ގޮތުގައި ސޮނީއިންވަނީ މި ހުށަހެޅުމަށް އިންކާރުކޮށްފައެވެ. މިކަމުގައި ސޮނީގެ ހުށަހެޅުމަށް ޑިޒްނީއިން އިންކާރުކޮށްފައިވާކަމަށްވެސް ޚަބަރުތައް ލިބެމުންދެއެވެ.
