ހައްޖުގެ މާތް އަޅުކަމަށްފަހު އެނބުރި އަންނައިރު، ބަލިވެ އުޅޭނަމަ، ބަލި ހާލަތު އިތުރަށް ގޯސްވެދާނެ ކަމަށްޓަކައި ހައްޖާޖީން އަދި އާއިލާއިން ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފިއެވެ.
ބަލިވެ އުޅޭނަމަ، ބަލި ހާލަތު އިތުރަށް ގޯސްވެދާނެ ކަމަށްޓަކައި ހައްޖާޖީން އަދި އާއިލާއިން ސަމާލުވުމަށް އެޗްޕީއޭ އިން އިލްތިމާސްކޮށްފައިވާއިރު، މިހާރު ރާއްޖޭގައި ދަނީ ބޭރަށް ހިންގުމާއި ހޮޑުލެވުން އަދި ޓައިޕޮއިޑް ކިޔާ ހުމެއް ވަރަށް ގަދައަށް ފެތުރެމުންނެވެ.
ހައްޖުގެ އަޅުކަމުން އެނބުރިއަންނަ އިރު އަރިދަފުސް ރޯގާ އަދި ވައިރަލް ހުމުން ރައްކާތެރިވުމަށް އެޅިދާނެ ބައެއް ފިޔަވަޅުތަކައި މީގެން ބައްޔެއް ޖެހިއްޖެނަމަ ގޭގައި ދެވޭނެ ފަރުވާތައް އަދި ހައްޖާޖީން ހާއްސަ ސަމާލުކަމެއް ދޭންވީ ކަންތައްތައް އެޗްޕީއޭ އިން ވަނީ އާންމުކޮށްފައެވެ.
ހައްޖުން އަނބުރާ އަންނަ މީހުން ސަމާލުކަންދޭންވީ ކަންތައްތައް:
- ހައްޖުން އެނބުރި އަންނަތާ 14 ދުވަސް ތެރޭގައި ހުންއައިސް، ކެއްސާ، ނޭވާލާން އުނދަގޫވާނަމަ ލަސްނުކޮށް ޑޮކްޓަރެއްގެ މަޝްވަރާ ހޯދުން.
- ޑޮކްޓަރަށް ދައްކާއިރު ހައްޖުން ނުވަތަ އުމްރާއިން އެނބުރި އައި މީހެއް ކަމުގެ މައުލޫމާތު ދިނުން.
- މި ނޫންވެސް އިތުރު ބަލިމަޑުކަމެއްގެ އަލާމާތެއް ފެންނަނަމަވެސް ޑޮކްޓަރަށް ދެއްކުން.
އަރިދަފުސް ރޯގާ އަދި ވައިރަލް ހުމުން ރައްކާތެރިވުމަށް ސަމާލުކަން ދޭންވީ ކަންތައްތައް:
- އަރިދަފުސް ރޯގާ ޖެހިއްޖެނަމަ ކެއްސާ، ކިބިނހި އަޅާއިރު އަނގަމައްޗާއި ނޭފަތް ކުޑަރުމާލަކުން ނުވަތަ ޓީޝޫ އަކުން ނިވާކުރުން.
- ޓިޝޫފަދަ ތަކެތި ބޭނުންކުރުމަށްފަހު ހާމަތަންތަނަށް އެއްލާނުލާ އަދި ރައްކާތެރިކަމާއެކު ނައްތާލުން.
- އާންމު ސާފުތާހިރުކަމަށް ސަމާލުވުން އަދި ހާއްސަކޮށް، ސައިބޯނިލައިގެން އަތްދޮވުން.
- ރޯގާޖެހި ކެއސާ ނަމަ، މީހުން އެއްވެ އުޅޭ ތަންތަނަށް ނުދިއުން، ހާއްސަކޮށް މިފަދަ ތަންތަނަށް ކުޑަކުދިން ނުގެންދިއުން.
- ރޯގާޖެހިފައިވާނަމަ ކުޑަކުދިން ކައިރިއަށް ނުދިއުން އަދި އެކުދިން އުރާ ނުހެދުން.
އަރިދަފުސް ރޯގާ އަދި ވައިރަލް ހުން ޖެހިއްޖެނަމަ ގޭގައި ދެވިދާނެ ފަރުވާ:
- ގިނަގިނައިން ދިޔާތަކެތި ބޭނުންކުރުން.
- އަރާމުކުރުން.
- ކަޅުސައި، ލުނބޯ، އިނގުރު އަދި މާމުއި ފަދަ ބުއިންތައް ބޭނުންކުރުން.
- ހުންގަދަނަމަ ގައިގައި ފެން ހޭކުން (އާދައިގެ ތާފަނާ ފެން).
- ޕެރެސެޓަމޯލް ފިޔަވައި އެހެން ބޭހެއް ޑޮކްޓަރެއްގެ މަޝްވަރާއާ ނުލާ ބޭނުން ނުކުރުން.
