އިންޓަނެޓް ނުވަތަ ޕޯސްޓް މެދުވެރިކޮށް ބޭސް ނުވަތަ ބޭހުގެ މާއްދާ އެކުލެވޭ ބާވަތްތައް އަމިއްލަ ބޭނުމަށް އެތެރެކުރުމަކީ މަނާ ކަމެއް ކަމަށް މިނިސްޓްރީ އޮފް ހެލްތުން ބުނެފިއެވެ.
މިއަދު ހެލްތް މިނިސްޓްރީން ގެޒެޓް ކުރި އިއުލާނުގައިވާ ގޮތުން، ބޭހާއި ބެހޭ ގަވާއިދަށް 1 ވަނަ އިސްލާހު ގެނައުމުގެ ގަވާއިދުގެ މަތިން އިންޓަނެޓް ނުވަތަ ޕޯސްޓް މެދުވެރިކޮށް ބޭސް ނުވަތަ ބޭހުގެ މާއްދާ އެކުލެވޭ ބާވަތްތައް އަމިއްލަ ބޭނުމަށް އެތެރެ ކުރެވޭނީ، ސައްހަ ބޭސް ސިޓީއެއް އޮވެގެންނެވެ. އަދި ވިޔަފާރީގެ ގޮތުގައި އިންޓަނެޓް ނުވަތަ ޕޯސްޓް މެދުވެރިކޮށް ބޭސް ނުވަތަ ބޭހުގެ މާއްދާއެއް އެކުލެވޭ އެއްވެސް ބާވަތެއް އެތެރެކޮށް ވިއްކުމަކީ މަނާކަމެއް ކަމަށް ވެސް އެ ގަވާއިދުގައި ބުނެއެވެ.
ހެލްތް މިނިސްޓްރީން ބުނީ އޮންލައިންކޮށް ގަނެގެން ޕޯސްޓުގެ ޒަރީއާއިންނާއި، އަތްމަތީ ގެނެސްގެން ވިޔަފާރީގެ ގޮތުގައި އިޝްތިހާރުކޮށް، އެކިގޮތްގޮތަށް، ބޭސް ނުވަތަ ބޭހުގެ މާއްދާއެއް އެކުލެވޭ ބާވަތްތަކުގެ ބޭސްތައް ވިއްކަމުންދާކަން ފާހަގަ ކުރެވޭ ކަމަށެވެ. އަދި މިފަދަ ގޮތްގޮތަށް އެތެރެކުރާ ބޭސްތަކަކީ އެ މިނިސްޓްރީގައި ރަޖިސްޓްރީކޮށް އޭގެ ރައްކާތެރިކަން ކަށަވަރު ކުރެވިފައިވާ ބޭހެއް ނޫން ކަމަށާއި، ބައެއް ބޭހުގައި އެކުލެވިގެންވާ ހުރިހާ މާއްދާތައް ލޭބަލްގައި ހިމަނާފައި ނުވާކަން ވެސް ފާހަގަ ކުރެވިފައިވާ ަކމަށް ހެލްތް މިނިސްޓްރީން ބުނެއެވެ.
މީގެ އިތުރުން، ހެލްްތު މިނިސްޓްރީން ބުނީ ގަވާއިދާއި އެއްގޮތަށް އެ މިނިސްޓްރީން ނަގަން ޖެހޭ ހުއްދަތައް ނުނަގާ އެގޮތަށް ބޭސް އިމްޕޯޓްކޮށް ވިއްކުމަކީ މަނާކަމެއް ކަމަށާއި މިފަދައިން ބޭސް އިމްޕޯޓްކޮށް ވިއްކާނަމަ އެ ފަރާތްތަކާއިމެދު ގަވާއިދުގެ ދަށުން ފިޔަވަޅު އަޅާނެ ކަމަށެވެ.
