މިއަދު މަރުވި ތެލެސީމިއާ ކުއްޖާއާއެކު، ފާއިތުވި ދެ މަސްތެރޭގައި ތެލެސީމިއާ ޕޭޝެންޓުން މަރުވި އަދަދު 9 އަކަށް އަރައިފިއެވެ.
ރޭ ފަތިހުގެ ވަގުތެއްގައި މަރުވެފައިވަނީ އދ. މާމިގިއްޔަށް އުފަން އަންހެން ކުއްޖެކެވެ. މިއީ މާމިގިލިން މަރުވި ތެލެސީމިއާ ދެވަނަ ކުއްޖާއެވެ. މަރުވި ކުއްޖާގެ އުމުރަކީ 18 އެވެ. އަދި އޭނާ މަރުވެފައިވަނީ ބޯން މެރޯ ހެދުމަށްފަހު ހާލު ސީރިއަސް ވެގެން އިންޑިއާގެ ބެންގަލޯރުގެ ހޮސްޕިޓަލެއްގައި ފަރުވާދެމުން ދަނިކޮށެވެ.
ތެލެސީމިއާ ޕޭޝެންޓުންގެ ތެރެއިން މަރުވަމުންދަނީ އުމުރުން 11 އަހަރާއި 27 އަހަރާ ދެމެދުގެ މީހުންނެވެ. މި މައްސަލައިގައި މޯލްޑިވްސް ތެލަސީމިއާ ސޮސައިޓީން ވަނީ ކަންބޮޑުވުންތައް ހުރިކަމަށް ބުނެ ބަޔާނެއް ވެސް ނެރެފައެވެ.
އެ ސޮސައިޓީން ބުނެފައިވަނީ ތެލެސީމިއާ ހުންނަ ފަރާތްތަކަށް ދެވޭ ފަރުވާއަށް އެކަށީގެންވާ ބަދަލެއް މިހާތަނަށް އައިސްފައި ނުވާކަމަށާއި، އެފަދަ ފަރާތްތަކަށް ދެވޭ އަޅާލުން ކުޑަކަމަށެވެ.
