އެންމެ ގިނަ މީހުން ބެލި، އެންމެ ޒަމާންވީ ވީޑިއޯގެ ޝަރަފު، މިއުޒިކްގެ ބޭންޑް "ކުއީން"ގެ އެންމެ މަޝްހޫރު އެއްލަވަ "ބޮހީމިއަން ރެޕްސަޑީ"ގެ މިއުޒިކް ވީޑީއޯއިން ކަށަވަރުކޮށްފިއެވެ.
މީގެ 44 އަހަރު ކުރިން ރިލީޒްކުރި މި ލަވައިގެ މިއުޒިކް ވީޑިއޯ ޔޫޓިއުބްގައި ހިއްސާކުރި ފަހުން މިހާތަނަށް މި ވީޑިއޯއަށްވަނީ 1 ބިލިއަން ވިއުޒް ލިބިފައެވެ.
1 ބިލިއަން ވިއުޒް ހަމަކުރި ފުރަތަމަ ޔޫޓިއުބް ވީޑިއޯއަކީ ސައިގެ "ގަންގްނަމް ސްޓައިލް"އެވެ. މި ވީޑިއޯއަށް މިހާރު ވަނީ 3.3 ބިލިއަން ވިއުޒް ލިބިފައެވެ.
"ގަންގްނަމް ސްޓައިލް"ވެސް ވައްޓާލުމަށްފަހު އެންމެ ގިނަ ވިއުޒް ލިބިފައިވާ ޔޫޓިއުބް ވީޑިއޯގެ ޝަރަފު އަދިވެސް އޮތީ ލުއީ ފޮންސީގެ "ޑެސްޕަސީތޯ" އަށެވެ. މި ލަވައިގެ އޮފިޝަލް ވީޑިއޯއަށް 6.3 ބިލިއަން ވިއުޒް ވަނީ ލިބިފައެވެ.
މި ހަފުތާގެ ފެށުމާ ހަމައަށް، 20 ވަނަ ގަރުނުގެ މިއުޒިކް ވީޑިއޯތަކުގެ ތެރެއިން އެންމެ ގިނަ މީހުން ބެލި ވީޑީއޯ ލަވައިގެ ޝަރަފު އޮތީ "ގަންސް އެން ރޯޒަސް"ގެ "ނޮވެމްބާ ރެއިން" އަށެވެ.
"ނޮވެމްބާ ރެއިން" ވައްޓާލުމަށްފަހު އެ މަގާމަށް "ބޮހީމިއަން ރެޕްސަޑީ" އަރާފައި މިވަނީ، ކުއީންގެ ލީޑް ފްރެޑީ މާކިއުރީގެ ހަޔާތުގެ މައްޗަށް ބިނާކޮށް މިދިޔަ އަހަރު ރިލީޒް ކުރި ފިލްމް "ބޮހީމިއަން ރެޕްސަޑީ"އަށް ލިބުނު އާދަޔާ ހިލާފު ބޮޑު ތަރުހީބުގެ ސަބަބުންކަމުގައި ދެންނެވިދާނެއެވެ.
"ބޮހީމިއަން ރެޕްސަޑީ"ގެ މިއުޒިކް ވީޑީއޯއަށް މިލިބުނު ކާމިޔާބީ ފާހަގަކޮށް، "ކުއީން"ގެ މެމްބަރުންގެ ތެރެއިން މިހާރު ދުނިޔޭގައި ތިބި ބްރާޔަން މޭއާއި ރޮޖާ ޓޭލާ ވަނީ "ބޮހީމިއަން ރެޕްސަޑީ"ގެ ރީމާސްޓާ ކޮޕީއެއް، 4ކޭ ވީޑިއޯ ކޮލިޓީގައި ރިލީޒްކޮށްފައެވެ.
ޔޫޓިއުބްގައި ހިއްސާކޮށްފައިވާ އެހެނިހެން ވީޑީއޯ ލަވަތަކަށް ބަލާއިރު، ރިލީޒްކުރިޔާ އެންމެ ކުޑަ ދުވަސްކޮޅެއްގެ ތެރޭގައި 1 ބިލިއަން ވިއުޒް ހޯދި ލަވައިގެ ޝަރަފު އޮންނަނީ އެޑެލްގެ "ހެލޯ" އަށެވެ. މި ލަވައިގެ މިއުޒިކް ވީޑިއޯއަށް 1 ބިލިއަން ވިއުޒް ލިބުނީ، ރިލީޒްކުރިތާ އެންމެ 87 ދުވަހުގެ ތެރޭގައެވެ.
ޔޫޓިއުބްގައި މިހާރުވެސް އެންމެ ގިނަ މީހުން ފޮލޯކުރަމުންދާ މިއުޒީޝަންއަކީ ޖަސްޓިން ބީބާއެވެ.
