މާތްވެގެންވާ ކަޢުބަތުﷲ ގެފުޅުގެ ވަށައިގެން ލެވިފައިވާ ކަޅު އުރަކޮޅު ނުވަތަ ކިސްވާގެ ބައެއް މައްޗަށް ވާ ގޮތަށް އުފުލާ، އޭގެ ތެރެއަށް ވާގޮތަށް ހުދު ފޮތީގެ އުރަކޮޅެއް މިހާރު އަޅުވާފައިވާނެ ކަމަށް ރިއާސާ އަލް ޙަރަމައިނިން ހާމަކުރައްވައިފިއެވެ.
1440 ވަނަ އަހަރުގެ ޙައްޖުގެ އަޅުކަމަށް ވަމުންދާ އެންމެ ފަހުގެ ތައްޔާރީތަކުގެ ތެރެއިން ގެފުޅުގެ ކަޅު އުރަކޮޅު 3 މީޓަރެއްހާ ތަން މައްޗަށް ނަގާފައިވަނީ، ގެފުޅު ވަށައިގެން ތޮވާފު ކުރަމުންދާ ބައެއް މީހުން ކިސްވާގައި އަތްކާއްތާ، އެއަށް ދަމާ ހެދުން ފަދަ ކަންކަން ކުރަމުންދާތީއެވެ. ކިސްވާ އުފުލާ، އޭގެ ދަށުން ހުދު އުރަކޮޅެއް އެރުވުމަކީ ކިސްވާ ރައްކާތެރިކޮށް ބޭއްވުމަށްޓަކައި ސައުދީއިން ކޮންމެ އަހަރަކުވެސް ޙައްޖު މޫސުމާ ދިމާކޮށް ކުރަމުން އަންނަ ކަމެކެވެ. ގެފުޅުގެ އުރަކޮޅުގައި ބައެއް މީހުން އަތްކާތާ ހަދަމުން ދަނީ ހީވެފައި އޮންނަ ކުށްހީއެއްގެ ސަބަބުން ކަން ސައުދީގެ ކަމާބެހޭ ފަރާތްތަކުން ފާހަގަކުރެއެވެ.
ކިސްވާ އުފުލުމުގެ މަސައްކަތުގައި މިއަހަރު ބައިވެރިވެފައިވަނީ 50 މެމްމަރުންގެ މައްޗަށް އެކުލެވޭ ފަންނީ އަދި ތަޖުރިބާކާރުންގެ ޓީމަކުންނެވެ.
ސައުދީގެ އޮފިޝަލަކު ވިދާޅުވީ، ޙައްޖު މޫސުން ނިމުމާއެކު ކަޢުބާގެ ވަށައިގެން ލެވިފައިވާ އަސްލު ކިސްވާ އަލުން އެޅުވޭނެ ކަމަށެވެ. ގެފުޅު ވަށައިގެން ލެވިފައި އޮންނަ މުސްކުޅި ކިސްވާ ނެގުމަށްފަހު، ކޮންމެ އަހަރެއްގެވެސް ޙައްޖު މަހުގެ 9 ވަނަ ދުވަހު އާ އުރައެއް އެޅުވެއެވެ.
ކަޢުބާގެ ކިސްވާ ފެހުމުގެ މަސައްކަތް ކުރަނީ ކިންގް ޢަބްދުލްޢަޒީޒު ކޮންޕްލެކްސް ފޯ ހޯލީ ކަޢުބާ ކިސްވާގައެވެ. މިތަނުގައި 200 އަށްވުރެ ގިނަ މުވައްޒަފުން ތިބޭއިރު، ދުނިޔޭގައި ހުރި އެންމެ ބޮޑު ފަހާ ފޮށިވެސް ހުންނަނީ މި ތަނުގައެވެ. އެ ފަހާ ފޮށީގެ ބޮޑު މިނުގައި 16 މީޓަރު ހުންނަ ކަމަށްވެއެވެ.
ކަޢުބާގެ ދޮރުކޮޅުގެ މަތިންދަމާފައިވާ ފޮތިގަނޑުގެ ބަރުކަމާއެކު އެ ފޮތިގަނޑަކީ ސީދާ ކަޢުބާގެ ފާރަށް ހަރުކުރެވިފައިވާ ފޮތިގަނޑެއް ކަމަށް މައުލޫމާތު ލިބެއެވެ.
