"ފްރޭމްވޯކް ފޯ ޒީރޯ ލެޕްރަސީ" އިފްތިތާހް ކޮށްފިއެވެ.
ރާއްޖެއަކީ ލެޕްރަސީ ނުވަތަ ޖުޒާމް ބަލި ނެތް ގައުމެއްގެ ގޮތުގައި ކަނޑައެޅުމަށް މަސައްކަތްކުރާނެ ގޮތުގެ ފްރޭމްވޯކް އިފްތިތާހްކޮށްފައި ވަނީ، މިއަދު ހޮޓެލް ޖެންގައި ބޭއްވި ހާއްސަ ހަފްލާގައެވެ. މި ބައްދަލުވުން ޝަރަފުވެރިކޮށްދެއްވީ ދުނިޔޭގެ ސިއްހަތު ޖަމިއްޔާގެ ރީޖަނަލް ޑިރެކްޓާ ޑރ. ޕޫނަމް ކެތްރަޕަލް ސިންގްއެވެ.
މި ހަފްލާގައި ނައިބުރައީސް ފައިސަލް ނަސީމް ބައިވެރިވެ ވަޑައިގެންނެވިއެވެ. މީގެ އިތުރުން މިނިސްޓާ އޮފް ހެލްތު އަބްދުﷲ އަމީން، ދުނިޔޭގެ ސިއްހަތު ޖަމިއްޔާއިން ރާއްޖެއަށް ކަނޑައަޅުއްވާފައިވާ ސަފީރު ޑރ. އަރްވިންދް މާތުރް، ޑިރެކްޓާ ޖެނެރަލް ޕަބްލިކް ހެލްތު ވެސް ބައިވެރިވެ ވަޑައިގެންނެވިއެވެ. އަދި މިނިސްޓްރީ އޮފް ހެލްތުގެ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުން އަދި އިސްވެރިން ބައިވެރިވެ ވަޑައިގެންނެވިއެވެ. މީގެ އިތުރުން ހޮސްޕިޓަލްތަކުން އަދި ހާއްސަކޮށް ހަމުގެ ޑޮކްޓަރުންގެ ބައިވެރިވުން ފާހަގަކުރެވެއެވެ.
މިބައްދަލުވުމުގައި މިނިސްޓާ އޮފް ހެލްތު އަބްދުﷲ އަމީން ގެ ވާހަކާގައި ލެޕްރަސީ ކޮންޓްރޯލްކުރުމަށް ކުރިން ކުރެވިފައި ހުރި މަސައްކަތް ފާހަގަކޮށް، މި ފްރޭމްވޯކް އެކުލަވާލުމުގެ ބޭނުން އަދި މި މަސައްކަތް ކުރުމަށް ރާއްޖެއިން މަސައްކަތް ކުރާނެ ކަމަށް އަލިއަޅުވާލާފައިވެއެވެ.
