ބޭރު ބައެއްގެ މަދަދާއެކު ދިވެހިން ގުޅިގެން 1988 ވަނަ އަހަރު ރާއްޖެއަށް ދިން އުދުވާނީ ހަމަލާގެ މޭސްތިރި ހ. ހާޖަރާގޭ އަބްދުﷲ ލުތުފީ ދާދި ދެންމެ މާލެ ގެނެސްފިއެވެ. އޭނާ މާލެ ގެނައީ މިރޭ ލަންކާއިން އައި އީކޭ ފްލައިޓުގައެވެ.
1988 ވަނަ އަހަރުގެ ނޮވެމްބަރު މަހުގެ 3 ވީ ބުރާސްފަތި ދުވަހު މާލެއަށް އަރާ ހަމައެއް ލަމައެއް ނެތި ބަޑިޖަހާ 19 ދިވެހިން ޝަހީދު ކޮށްލުމުގެ ހާދިސާގައި އިސްކޮށް ހުރި ލުތުފީ ރާއްޖެ ގެނެސްފައި ވަނީ ދިވެހި ފުލުހުންގެ ބެލުމުގެ ދަށުންނެވެ. އޭނާ ރާއްޖެ ގެނައީ ލަންކާއިންނެވެ. ލަންކާގައި އޭނާ އެންމެ ފަހުން ހުރީ އެ ގައުމުގައި ހުންނަ ދިވެހި އެމްބަސީގައެވެ.
ފުލުހުން ހާމަ ކޮށްފައި ވާ ގޮތުގައި ލުތުފީ މާލެ ގެނައުމަށް ފަހު ދެން ހަވާލު ކުރާނީ ކަރެކްޝަނާއެވެ. އޭނާ އަކީ ނޮވެމްބަރު 3 ގެ އުދުވާނީ ހަމަލާ އާ ގުޅިގެން އުމުރަށް ޖަލަށް ލުމަށް ހުކުމް ކޮށްފައި ހުރި މީހެކެވެ. އޭނާ ލަންކާއަށް ދިޔައީ ރައީސް ނަޝީދުގެ ވެރިކަމުގައި ބޭސް ފަރުވާއަށެވެ. އެއަށް ފަހު އޭނާ ލަންކާގައި ފިލައިގެން އުޅޭތާ އެތައް ޒަމާނެއް ވަނީ ވެފައެވެ.
މައުލޫމާތު ލިބިފައިވާ ގޮތުގައި ލުތުފީ ލަންކާގައި އުޅުނީ ނަން ބަދަލު ކޮށް ޒާން ގެ ނަމުގައެވެ. އަދި އެގައުމުގައި އުޅުނު ދިވެއްސަކާ ކައިވެނިކޮށްފައި ވާކަމަށްވެސް ވަނީ މައުލޫމާތު ލިބިފައެވެ.
ލުތުފީ ރާއްޖެ ގެނައި އިރު އަދިވެސް އޭނާގެ ހުކުމުގައި ބާކީ 4 އަހަރާ ދުވަސްކޮޅެއް އެބަ އޮތެވެ.
