މަޝްހޫރު ޑްރާމާ ސީރީޒް "ހައުސް އޮފް ކާޑްސް"ގެ ތަރި ކެވިން ސްޕޭސީއާއި ދެކޮޅަށް އުފުލި ޖިންސީ ގޯނާކުރި ކަމުގެ ކުށުގެ ދައުވާ އަނބުރާ ގެންގޮސްފިއެވެ.
މީގެ 3 އަހަރުކުރިން ކެވިން ސްޕޭސީގެ ފަރާތުން ޖިންސީ ގޯނާ ލިބިފައިވާ ކަމަށް ބުނެ ދައުވާ ކުރި މީހާގެ ވަކީލެއްގެ ގޮތުގައި މަސައްކަތް ކުރަމުން އަންނަ މިޗެލް ގެރަބީޑިއަން ބުނީ އޭނާގެ ކްލަޔަންޓް، ދައުވާ އަނބުރާ ގެންދިޔައީ އަމިއްލަ އިހުތިޔާރުގައި ކަމަށެވެ.
ސްޕޭސީއާއި ދެކޮޅަށް ޖިނާއީ ކުށެއްގެ ދައުވާ ބަލަމުންދާތީ މިކަމާ ބެހޭ އިތުރު ތަފްސީލެއް ދިނުމަށް، ދައުވާ ހުށަހެޅުމަށްފަހު އަނބުރާ ގެންދިޔަ މީހާގެ ވަކީލު ވަނީ އިންކާރުކޮށްފައެވެ.
މަދަނީ ދައުވާ އަނބުރާ ގެންގޮސްފައިވަނީ ކްލަޔަންޓްގެ އަމިއްލަ އިހުތިޔާރުގައި ކަމަށް ބުނެފައިވާތީ، މިމައްސަލަ ދައުވާއެއްގެ ގޮތުގައި އަލުން އުފުލުމުގެ ހައްގު، އެ ފަރާތަކަށް ދެނެއް ނުލިބޭނެއެވެ.
ސްޕޭސީ ދަނީ އޭނާއާއި ދެކޮޅަށް އުފުލާފައިވާ ޖިންސީ ގޯނާގެ ދައުވާއަށް އިންކާރުކުރަމުންނެވެ.
މަސައްކަތުގެ ވެށީގައި ކުރިމަތިލާންޖެހޭ ޖިންސީ ފުރައްސާރައާއި ގޯނާގެ ވާހަކަތައް މުޖުތަމައުގެ ސަމާލުކަމަށް ގެނައުމަށް "މީޓޫ"ގެ ނަމުގައި ފެށި ސޯޝަލް މީޑިއާ ކެމްޕޭންގެ "ހަމަލާ" އަމާޒުވި މީހުންގެ ތެރޭގައި ސްޕޭސީ ހިމެނެއެވެ.
