މަޝްހޫރު "ޖޭމްސް ބޮންޑް" ފިލްމް ފްރެންޗައިސްގެ އެންމެ ފަހުގެ ފިލްމުގައި ނުބައިބައި ރޯލު އަދާކުރުމަށް އެއްބަސްވީ، އެ ކެރެކްޓަރުގެ އަމަލުތައް ހުންނަ ގޮތުން އެއްވެސް ދީނެއްގެ ފިކުރާ ގުޅުމެއް ނުވާނެކަން ކަށަވަރު ކުރުމަށްފަހުގައި ކަމަށް، ކުޑަ ދުވަސްކޮޅެއްގެ ތެރޭގައި ގިނަ ބައެއްގެ ސަމާލުކަން ހޯދި މިސްރު ދަރިކޮޅުން އުފަންވި ޒުވާން ބަތޮލް ރާމީ މަލެކް ބުނެފިއެވެ.
ނުބައިބައި ރޯލު ކުޅެން އެއްބަސްވި ސަބަބު ހާމަކުރަމުންދާ ރާމީ ބުނީ، އެ ރޯލަށް އޭނާ އެއްބަސްވީ "ޓެރަރިޒަމް"ގެ އެއްވެސް އަމަލަކާ ވަކި ދީނެއް އަޅުވާ ކިއާ ލޭބަލް ނުކުރާނެކަން ކަށަވަރުކުރުމަށް ފަހުގައެވެ. އަދި އެ ރޯލަށް އޭނާ ހޮވީ ވަކި ދީނެއްގެ މީހަކަށް އޭނާ ވަތީ ކަމަށް ވަނީނަމަ، އެ ރޯލުން އޭނާ ނުފެންނާނެ ކަމަށް ކަމާ ބެހޭ ފަރާތްތަކުގެ ގާތުގައި ބުނެފައިވާނެކަމަށްވެސް ރާމީ ވަނީ ހާމަކޮށްފައެވެ.
މަޝްހޫރު ލަވަކިއުންތެރިޔާ ފްރެޑީ މާކިއުރީގެ ދިރިއުޅުމުގެ މައްޗަށް ބިނާކޮށް އުފެއްދި ފިލްމް "ބޮހީމިއަން ރެޕްސަޑީ"އިން ގިނަ ބައެއްގެ ލޯބި ހޯދި ރާމީ ހަރަކާތްތެރިވަމުންދަނީ "ޖޭމްސް ބޮންޑް" ފްރެންޗައިޒްގެ 25 ވަނަ ފިލްމުގައެވެ. މިފިލްމަށް ރަސްމީކޮށް އަދި ނަމެއް ދީފައެއް ނުވެއެވެ.
2020 ވަނަ އަހަރުގެ އޭޕްރިލް މަހު ރިލީޒްކުރުމަށް ހަމަޖެހިފައިވާ މި ފިލްމުގައި އޭނާ އަދާކުރާ ރޯލާ ބެހޭ ގޮތުން ވާހަކަދައްކަމުން ރާމީ ބުނީ އޭނާގެ ކެރެކްޓަރަކީ ވަރަށް ތަފާތު "ޓެރަރިސްޓެއް" ކަމަށާ، އޭނާގެ ކެރެކްޓަރަކީ ވަރަށް ވަރުގަދަ ޝަހްސިއްޔަތެއް ކަމަށެވެ.
މިފިލްމުގައިވެސް ޖޭމްސް ބޮންޑްގެ ރޯލުން ފެނިގެންދާނީ ޑެނިއަލް ކްރެއިގްއެވެ.
