ވެބްސައިޓްތަކުގެ ސެކިއުރިޓީ ފޯރުކޮށްދެމުން އަންނަ ކުލައުޑްފުލޭއާ އަށް މައްސަލައެއް ދިމާވެ އެތައް މިލިއަން ވެބްސައިޓެއް ޑައުންވެއްޖެއެވެ.
މިރޭ ދިމާވި މި މައްސަލައާއި ގުޅިގެން ރާއްޖޭގެ ބައެއް ހަބަރު ސައިޓްތަކަށް ވެސް ނުވަދެވި މައްސަލަ ދިމާވިއެވެ. މައްސަލަ ދިމާވި ވެބްސައިޓް ތަކުގެ ތެރޭގައި ދަ ޕްރެސްގެ އިތުރުން ބައެއް މެއިން ސްޓްރީމް ވެބްސައިޓްތައް ވެސް ހިމެނެއެވެ.
ވެބްސައިޓްތަކަށް ވަންނަން މަސައްކަތް ކުރުމުން އެ ސައިޓަކަށް ވަދެވެނީ ކުލައުޑްފުލެއާ މެދުވެރިކޮށެވެ. އަދި ކުލައުޑް ފުލެއާއަށް ދިމާވި މައްސަލަައިގައި މުޅި ދިނުޔޭގެ އެކި ހިސާބުތަކުގައި ބޭނުން ކުރަމުން އަންނަ ވެބްސައިޓްތަކަށް މި މައްސަލަ ދިމާވި ކަމަށް ރިޕޯޓްތައް ބުނެއެވެ. ވެބްސައިޓުތަކަށް ވަންނަން މަސައްކަތް ކުރުމުން މިރޭ އަރަމުން ދިޔައީ "502 ބޭޑް ގޭޓްވޭ އެރާ" އެކެވެ.
ކުލައުޑްފުލެއާގެ ސީއީއޯ މެތިއު ޕްރައިސް ބުނެފަައިވަނީ ކުލައުޑް ފުލެއާއަށް މައްސަލައެއް ދިމާވެގެން އެ މައްސަލަ ހައްލުކުރުމުގެ މަސައްކަތް ކުރަމުންދާ ކަމަށާއި، މައްސަލަ ދިމާވާން މެދުވެރިވި ސަބަބުން ދެނެގަތުމަށް ޓީމެއް މިހާރު މަސައްކަތް ކުރަމުންދާ ކަމަށެވެ.
ރާއްޖޭގެ މިނިސްޓްރީ އޮފް ކޮމިއުނިކޭޝަނުން ވެސް ބުނެފައިވަނީ ކުލައުޑްފުލެއާ އަށް ދިމާވި މައްސަލައިގެ ސަބަބުން އޮންލައިންކޮށް ދެމުން އަންނަ ބައެއް ހިދުމަތްތަކަށް ބުރޫ އަރާފައިވާ ކަމަށެވެ.
