އަފްޣާނިސްތާނުގެ ދިފާއީ ވުޒާރާ ހުންނަ ސަރަހައްދުގައި ބާރުގަދަ ގޮވުމެއް ގޮވައިފިއެވެ.
މި ހާދިސާ ހިނގާފައިވަނީ ބައިބޯ ވަގުތެއްގައިކަމުން، ގިނަ ބައެއްގެ ފުރާނައަށް ނުރައްކާވެފައިވުން އެކަށީގެންވާކަމަށް މައުލޫމާތު ލިބެއެވެ. ނަމަވެސް އަދި ތަފްސީލުތަކެއް ނުލިބެއެވެ.
މަންޒަރުދުށް މީހުން ކިޔާދީފައިވާ ގޮތުގައި ގޮވުމުގެ ވަރުގަދަ އަޑާއެކު އިމާރާތްތަކަށްވެސް ވަނީ ލޮޅުން އަރާފައެވެ.
އަފްޣާނިސްތާނުގެ ފުލުހުންވަނީ މިފަދަ ހާދިސާއެއް ހިނގައިގެން އުޅޭކަން ކަށަވަރުކޮށްދީފައެވެ. ނަމަވެސް އަދި އެއްވެސް ތަފްސީލެއް ހާމަކޮށްފައެއް ނުވެއެވެ.
މި ގޮވުމާ ވިދިގެން ބަޑީގެ ހަމަލާތަކެއް ބަދަލުކުރިއަޑުވެސް އިވިގެންދިޔަ ކަމަށް ބައިނަލްއަގުވާމީ ޚަބަރުތައް ބުނެއެވެ.
މި ގޮވުން ގޮއްވާލި ސަރަހައްދަކީ އަފްޣާނިސްތާނުގެ ދިފާއީ ވުޒާރާގެ އިތުރުން ސަރުކާރުގެ ގިނަ އިމާރާތްތަކެއްވެސް ހުންނަ ސަރަހައްދެކެވެ. ހަމައެހެންމެ، އަފްޣާން ފުޓްބޯޅަ ފެޑަރޭޝަންއާއި އަފްޣާނިސްތާނު ކުރިކެޓް ބޯޑުގެ އިދާރާވެސް ހުންނަނީ މި ސަރަހައްދުގައެވެ.
އަފްޣާނިސްތާނުގައި މިފަދަ ހާދިސާއެއް ހިނގާފައި މިވަނީ، ތޯލިބާނުންގެ ހަމަލާތަކެއްގައި 19 މީހެއްގެ ފުރާނަ ގެއްލުނުތާ 1 ދުވަސްފަހުންނެވެ. މި ދަނޑިވަޅަކީ އަފްޣާނިސްތާނުގެ ސަރުކާރާ ތޯލިބާން ހަނގުރާމަވެރިން ސުލްހަކުރުމުގެ ނަމުގައި، އެމެރިކާ އިސްވެއޮވެ، ގަތަރުގައި މަޝްވަރާތަކެއްވެސް ކުރިއަށް ގެންދާ ދަނޑިވަޅެކެވެ.
