މެޓް ރީވްސް ޑައިރެކްޓާކުރާ ފިލްމް "ދަ ބެޓްމޭން"ގައި ބެޓްމޭންގެ ރޯލުން ފެނިގެންދާނީ "ޓްވައިލައިޓް" ފްރެންޗައިޒްއިން ގިނަ ބައެއްގެ ސަމާލުކަން ހޯދި ރޮބާޓް ޕެޓިންސަން ކަމަށް ޚަބަރު ލިބިއްޖެއެވެ.
"ޕްލެނެޓް އޮފް ދި އޭޕްސް"ގެ 2 ސީކިއުލްވެސް ޑައިރެކްޓްކުރި މެޓް ރީވްސްގެ ބެލުމުގެ ދަށުން އަލަށް އުފައްދާ "ދަ ބެޓްމޭން" ފިލްމުގެ ލީޑުން ރޮބާޓް ޕެޓިންސަން ޖާގަ ހޯދާފައި މިވަނީ ގިނަ ތަރިންތަކަކާ ވާދަކުރުމަށްފަހުގައެވެ.
ފިލްމުގެ ޝޫޓީންގް އަންނަ މަހު ފެށުމަށް ހަމަޖެހިފައިވާއިރު، ބެޓްމޭންގެ ރޯލުން ފެނިގެންދާނީ ރޮބާޓް ޕެޓިންސަންކަން ރަސްމީކޮށް އަދި އިއުލާންކޮށްފައެއް ނުވެއެވެ. ވޯނާ ބްރޮސްގެ ތަރުޖަމާނަވެސް މިކަން ކަށަވަރުކޮށްދީފައެއް ނުވެއެވެ. ނަމަވެސް މަޝްވަރާތަކެއް ހިނގިކަން އޭނާ ވަނީ ޔަގީންކޮށްދީފައެވެ.
ރޮބާޓް ޕެޓިންސަންގެ ފިލްމަކަށް އެންމެ ފަހުން ފެނިގެންދިޔައީ "ދަ ލައިޓްހައުސް"އެވެ. ބިރުވެރި ވާހަކައެއްގެ މައްޗަށް ބިނާކޮށް އުފެއްދި މި ފިލްމުގައި ރޮބާޓް ޕެޓިންސަން އަދާކުރި ރޯލަށް، މިއަހަރުގެ ކޭންސް ފިލްމް ފެސްޓިވަލްގައި ބޮޑު ތަރުހީބެއް ވަނީ ލިބިފައެވެ.
