އިސްރާއީލުން ޣައްޒާއަށް ދެމުންދާ އުދުވާނީ ހަމަލާތައް، ބަރަކާތްތެރި ރަމަޟާން މަހާ ދިމާކޮށް ވަރުގަދަ ކުރާ ވާހަކައަކީ އާ ވާހަކައެއް ނޫނެވެ. މާމަ ކާފަ ޒަމާނުން ފެށިގެން މިކަން އޮތީ މިހެން ކަމުގައި ވީ ނަމަވެސް، ކޮންމެ ހަމަލާއަކާ ގުޅިގެން ލިބެމުންދާ މަންޒަރުތަކާ، އިވެމުންދާ އަޑުތަކަކީ އިންސާނިއްޔަތުކަމުގެ ކުޑަނަމަވެސް އަގަލެއް ހުރި މީހެއްގެ ހިތް ދަތިކުރުވާނެ މަންޒަރުތަކަކާ އަޑުތަކެކެވެ. ކިތަންމެ ވަރަކަށް މިމަންޒަރުތައް ފެނި، އަޑުތައް އިވުނު ކަމުގައި ވީ ނަމަވެސް ދުވަހަކުވެސް މިކަމަށް ނުހޭނެވެއެވެ.
1440 ވަނަ އަހަރުގެ ރަމަޟާން މަހާވެސް ޣައްޒާގެ ރައްޔިތުން ކުރިމަތިލާފައި ވަނީ އިސްރާއީލުގެ ވަރުގަދަ އުދުވާންތަކެއްގެ ތެރޭގައި ވަނިކޮށެވެ. ހަފުތާގައި ބަންދުގައި ވަރުގަދަ ހަމަލާތަކެއް ދިންއިރު އޭގެ ޝިކާރައަކަށްވީ އެއް ފުރާނައަކީ އުމުރުން އެންމެ 1 އަހަރުގެ ޝީބާއެވެ. އިސްރާއީލުން ދިން ވައިގެ ހަމަލާ އަމާޒުވީ އެ މައުސޫމު ޝީބާ ދިރިއުޅެމުންދިޔަ ގެއަށެވެ. އެ ހަމަލާގައި ޝީބާގެ ބޮޑުދައިތަވެސް ވަނީ ޝަހީދުވެފައެވެ. ޝީބާއާއި އޭނާގެ ބޮޑުދައިތަ ހިމެނެނީ ފާއިތުވީ 72 ގަޑިއިރެއްހާއިރު ތެރޭގައި އިސްރާއީލުގެ ޝިކާރައަކަށްވި ފަލަސްޠީނުގެ 24 ޝަހީދުންގެ ތެރޭގައެވެ.
ޝީބާގެ މަންމަގެ ލޮލުން މިއިން ދުވަހަކު ކަރުނަ ހިކޭނެ ކަމުގެ ނިޝާނެއް ނެތެވެ. އުމުރުން 27 އަހަރުގެ ޒުވާން، ރަޝާ އަބޫ އަރާރުގެ ކޯތާފަތްމައްޗަށް ފައިބަމުންދިޔަ ކަރުނަތައް ފޮހެލަން އަތް ނެގިއިރު އެ އަތްވެސް އޮތީ ޒަހަމްވެފައެވެ.
"އަހަރެންނާ، އަހަރެންގެ ދެބެންގެ ދެދަރި ކުދިންނާ އެމީހުން ދަރިން ތިބީ ގޭގައި. ކުށްލިއަކަށް ގެއަށް ވެއްޓުނީ އިސްރާއީލުގެ ރޮކެޓެއް" މިހާރުވެސް ދަރިއަކަށް ބަލިވެ އިން ރަޝާ، ގިސްލާ ރޮމުން ކިއާދިނެވެ.
"ދަރިފުޅު ސަލާމަތްކުރަންވެގެން އޭނާގެ ގައިގައި އަހަރެން ބައްދާލިން. ގައިތެރެއަށް ލާ ބޮނޑިކޮށްލިން. އެކަމަކު ރޮކެޓުން ވިއްސައިގެން އައި ތޫނު އެއްޗެއް އަހަރެންގެ އަތްތިލަ ފޫ އަޅުވާލަފަ ގޮސް އެ ދަރިފުޅުގެ ހަށިގަނޑު ތެރެއަށް ވަނި"، އުމުރުން އެންމެ 1 އަހަރުގެ ދަރިފުޅު ޒަހަމްވީ ގޮތް ސިފަކޮށްދެމުން ރަޝާ ކިއާދިނެވެ.
6 ދަރިންގެ މަންމައެއްގެ ގޮތުގައި އިން ރަޝާ ބުނީ، މި ހަމަލާގައި އޭނާގެ 3 އަހަރުގެ ދަރިފުޅު ރަފީފަށްވެސް ބޮޑެތި ޒަހަމްތަކެއް ލިބިފައިވާކަމަށެވެ. އެ ތުއްތު ކުއްޖާ ފަރުވާ ދެމުންދަނީ އައި.ސީ.ޔޫގައެވެ.
"އަހަރެންގެ މި ތުއްތު ދަރިން ކުރި ކުށަކީ ކޮބާ؟ އެ ކުދިން އިސްރާއީލަށް ރޮކެޓެއް އެލީއްތަ"؟ ރަޝާ ކޮށްލީ ހަމަ އެންމެ 2 ސުވާލެވެ. އެހެންނަމަވެސް އެއީ މާނައިން ފުރިގެންވި، ދެކޮޅު ޖެހޭ ޖަވާބެއް ނެތް 2 ސުވާލެވެ.
އިސްރާއީލުގެ ރޮކެޓް ހަމަލާގައި ޝީބާއާއިއެކު ޝަހީދުވެދިޔަ އޭނާގެ ބޮޑު ދައިތައަކީ އުމުރުން 37 އަހަރުގެ ފަލިސްޠީންއެވެ. ރޮކެޓުން ވިއްސައިގެން ދިޔަ ތޫނު އެއްޗަކުން ކަރަށް ބޮޑެތި ޒަހަމްތަކެއް ލިބި ޝަހީދުވެދިޔައިރު ފަލިސްޠީން އިނީ އޭނާގެ 10 ވަނަ ދަރިފުޅަށް ބަލިވެއެވެ.
"މައެއްގެ ލޯބިން މަހުރޫމުވެފައި ތިބި މި ދަރިންތައް ފެންނަ ކޮންމެ ފަހަރަކު ހިތުން ލޭ ކަރުނަ ހިލޭ. މަޔަކާ ނުލާ މި ކުދިން ކިހިނެއް ދިރިއުޅުން ވޭތުކުރާނީ"؟ ފަލިސްޠީނުގެ މަންމަ، އޭނާގެ މާމަ ދަރިންގެ ވާހަކަތައް ކިއާދެމުން ބުންޏެވެ.
އިސްރާއީލުން ބުނާ ގޮތުގައި ޣައްޒާއަށް އަމާޒުކޮށް އިސްރާއީލުން ވަރުގަދަ ހަމަލާތަކެއް ދިނީ، ޣައްޒާ ކޮންޓްރޯލް ކުރަމުންދާ ހަމާސް ޖަމާއަތުގެ ހަނގުރާމަވެރި ގޮފީގެ ސްނައިޕަރަކު ދިން ހަމަލާއެއްގައި އިސްރާއީލު އަސްކަރިއްޔާގެ 2 މީހަކު ޒަހަމްވުމާ ގުޅިގެންނެވެ. އިސްރާއީލުގެ ހަމަލާތަކަށް ޣައްޒާއިންވެސް ރައްދު ދިން ކަމަށްވެއެވެ. އަނެއްކާވެސް އޭގެ ބަދަލުގައި އިސްރާއީލުން ވަރުގަދަ ހަމަލާތައް ދެމުންދިޔައެވެ. ފަލަސްޠީނުގެ ރައްޔިތުން އުކަމުންދިޔަ އޮއްގަލުގެ ބަދަލުގައި އިސްރާއިލު އަސްކަރިއްޔާއިން ހަމަލާ ދެނީ އެއްގަމާ، ވައިގެ އިތުރުން ކަނޑުމަގުން ބަރުހަތިޔާރު ބޭނުންކޮށްގެންނެވެ.
އިސްރާއީލުގެ ހަމަލާތައް ގިނައިން އަމާޒު ކޮށްފައިވަނީ ރަމަޟާން މަހަށް ތައްޔާރުވުމުގެ ގޮތުން މީހުން ޖަމާވެފައިވާ ބައިބޯ ބާޒާރުތަކަށެވެ. މުޅި އިމާރާތައް ލޮޅުން އަރާ، ފިހާރަތަށް ފުނޑުފުނޑުވެ، ގާކުނޑިއަށް ވެގެންދެއެވެ. އެތައް އަހަރެއް ވަންދެން ކާންބޯން ކުރި މަސައްކަތް ލޮލު ކުރިމަތީގައި ނެތިދަނީ މަދު ސިކުންތު ކޮޅެއްގެ ތެރޭގައެވެ.
ލިބެމުންދާ އެންމެ ފަހުގެ ޚަބަރުތަކަށް ބަލާއިރު މިއަދު ފަތިހުން ފެށިގެން އިސްރާއީލާ ޣައްޒާއާއި ދެމެދު ހަމަލާ ބަދަލުކުރުން އޮތީ "އެއްބަސްވުމެއް"ގެ ދަށުން މި ވަގުތަށް މެދުކަނޑާލާފައެވެ.
