ހައްދުފަހަނައަޅާފައިވާ ހަނގުރާމަވެރި އައިސިސް ޖަމާއަތުގެ ލީޑަރު އަބޫ ބަކުރު އަލް ބަޣުދާދީގެ ވީޑިއޯއެއް 5 އަހަރަށްފަހު އެ ޖަމާއަތުން ހާމަކޮށްފިއެވެ.
އައިސިސްގެ އަލް ފުރުގުއާން ނެޓްވާކުން އާންމުކޮށްފައިވާ މި ވީޑިއޯގައި ފެނިގެންދަނީ، އައިސިސްގެ ހަނގުރާމަވެރިން ހައްޔަރުކޮށް މަރަމުންދާ ދިއުމުގެ ބަދަލު ހިފާނެ ކަމަށް ބަޣުދާދީ ބުނާ މަންޒަރެވެ.
މިއީ ކޮން އިރަކު ރެކޯޑްކޮށްފައިވާ މަންޒަރުތަކެއް ކަށަވަރު ނުވި ކަމުގައި ވީ ނަމަވެސް، ނުރަވެފައިވާ ބޯ ތުނބުޅިއެއްލާފައި ހުރި ބަޣުދާދީ، ސޫރިޔާގެ ބާޣޫޒްގައި އައިސްއާއި ދެކޮޅަށް ދުނިޔޭގެ އަސްކަރީ ބާރުތަކުން ހިންގި ހަރަކާތްތަކަށް މުހާތަބުކޮށްފައިވަނީ މާޒީގައި ހިނގާ ނިމިފައި އޮތް ކަމެއްގެ ގޮތުގައެވެ. ބާޣޫޒްގައި އައިސިސްއާއި ދެކޮޅަށް ހިންގި ކުރިމަތިލުން ނިމުމަކަށް އައީ މިދިޔަ މަހުގެ ފަހުކޮޅުގައެވެ. އެހެންކަމުން، މިއީ އޭގެ ފަހުން ރެކޯޑްކޮށްފައިވާ މަންޒަރުތަކެއް ކަމަށް ބުރަވެވެއެވެ.
18 މިނެޓަށް ދެމިގެންދިޔަ މި ވީޑިއޯގައި ބަޣުދާދީ ވަނީ، އޭޕްރިލް 21 ވަނަ ދުވަހު ސްރީލަންކާގައި ދިން ޓެރަރިސްޓް ހަމަލާތަކާ ބެހޭ ގޮތުންވެސް ވާހަކަ ދައްކާފައެވެ. އަދި އެ ހަމަލާތަކަކީ ބާޣޫޒްގައި ނިކަމެތިވެގެންދިޔަ އައިސިސްގެ މެމްބަރުންނަށް ބަދަލު ހޯދާދިނުމަށް ހިންގި އަމަލެއްކަން ދޭހަވާފަދަ މޭރުމަކުން ބަޣުދާދީ ވަނީ ވާހަކަދައްކާފައެވެ.
މިއީ 2014 ވަނަ އަހަރު، އިރާގުގެ އަލް ނޫރީ މިސްކިތުގައި ތަގުރީރެއް ދެނިކޮށް ބަޣުދާދީގެ ވީޑިއޯއެއް ފެނުނުފަހުން މިހާތަނަށް ލިބުނު އޭނާގެ އެންމެ ފުރަތަމަ ވީޑިއޯއެވެ. އެ ތަގުރީރުގައި ބަޣުދާދީ ވަނީ ސޫރިޔާއާއި އިރާގު ހިމެނޭ ގޮތަށް އައިސިސްގެ ޚިލާފަތު ގާއިމު ކުރެވިފައިވާކަން އިއުލާންކޮށްފައެވެ.
ބަޣުދާދީ ހޯދާދިން ފަރާތަކަށް 25 މިލިއަން ޑޮލަރުގެ ބަދަލެއް ދޭނެ ކަމަށް އެމެރިކާއިން ބުނެފައިވާއިރު، އޭނާއަކީ މިހާރު މުޅި ދުނިޔޭގައިވެސް އެންމެ ހޯދަން ބޭނުންވެފައިވާ މީހެވެ.
ބަޣުދާދީ ވަނީ އޭނާގެ އޯޑިއޯ މެސެޖުތައް ދޭތެރެ ދޭތެރެއިން އާންމުކޮށްފައެވެ. މިފަދަ އޯޑިއޯ މެސެޖެއް އެންމެ ފަހުން އާންމުކޮށްފައިވަނީ 2018 ވަނަ އަހަރުގެ އޯގަސްޓް މަހުގެ ތެރޭގައެވެ.
އެންމެ ފަހުން އާންމުވި ވީޑިއޯގައި ބަޣުދާދީ ވަނީ، އެ ޖަމާއަތުން މަރުވި ހަނގުރާމަވެރިންނަށް ބަދަލު ހޯދާދިނުމަށް ހުޅަނގާ ދެކޮޅަށް ފަށާފައިވާ ހަނގުރާމަ ނިމުމަކަށް ނާންނަކަމަށާ، އަދިވެސް އިތުރު ހަމަލާތައް ދޭނެ ކަމުގެ އިންޒާރު ދީފައެވެ.
ޓެރަރިޒަމްގެ ހަރަކާތްތައް ދިރާސާކުރަމުންދާ ފަރާތްތަކުން ތުހުމަތުކުރާ ގޮތުގައި ސްރީލަންކާގައި އައިސިސްއިން ދިން ހަމަލާތަކަކީ، މެދުއިރުމަތީގައި އައިސިސްގެ ބާރު ކަނޑުވާލެވިފައި އޮތުމުން އެ ޖަމާއަތަށް ބާރުވެރި ސަމާލުކަމެއް ހޯދުމަށް ދިން ހަމަލާތަކެކެވެ. އަދި މި ދަނޑިވަޅުގައި އޭނާ ވީޑިއޯއެއް އާންމު ކުރުމަކީ، އޭނާ ދިރިދުނިޔޭގައި އެބަހުރިކަން އައިސިސްގެ ހަނގުރާމަވެރިންނަށް ކަށަވަރުކޮށްދިނުމުގެ ގޮތުން ކުރި ކަމެއް ކަމަށްވެސް އައިސިސްއާއި ބެހޭ އިލްމީ ދިރާސާތައް ކުރަމުންދާ ފަރާތްތަކުން ވަނީ ބުނެފައެވެ.
އޭޕްރިލް 21 ވަނަ ދުވަހު ސްރީލަންކާއަށް ދިން ޓެރަރިސްޓް ހަމަލާތަކުގައި މަރުވި މީހުންގެ އަދަދު 250 އަށްވުރެ މައްޗަށް އަރާފައިވާއިރު، މި ހަމަލާތަކުގެ ޒިންމާ، އައިސިސް ޖަމާއަތުން ވަނީ އުފުލާފައެވެ. އަދި ބޮމުގެ ހަމަލާ ދިން ކަމަށް ތުހުމަތު ކުރެވޭ މީހުން ފެންނަ ވީޑިއޯއެއްގައި އެމީހުންވަނީ ބަޣުދާދީއަށް ބައިޔަތުވެސް ހިފާފައެވެ.
