ބޮލީވުޑްގެ ޒުވާން ބަތޮލާ އާލިއާ ބަޓް، އޭނާގެ ލޯބިވެރިޔާ ރަންބީރު ކަޕޫރުގެ ނަމުން، އޮޅުމެއްގެ ތެރެއިން ވަރުން ދަވަންއާ މުހާތަބުކޮށް ވާހަކަދައްކައިފިއެވެ.
ރަންބީރާ އާލިއާގެ ލޯބީގެ ވާހަކަތަކުން ބޮލީވުޑް ދުނިޔޭގެ ޚަބަރުތައް ގުގުމުންދަނިކޮށް މިކަމެއް ހިނގާފައި ވަނީ އާލިއާގެ އެންމެ ފަހުގެ ފިލްމް "ކަލާންކް" ޕްރޮމޯޓްކުރުމަށް ފިލްމުގެ ކާސްޓާ ކްރޫއިން ދިން އިންޓަވިއުއެއްގައި ވާހަކަ ދައްކަމުންނެވެ.
ވަރުންނާ އާއި ރަންބީރުގެ ނަމުން އާލިއާއަށް މުހާތަބު ކުރެވުނުއިރު ވަރުން އާއި އާލިއާވެސް ތިބީ ސޯފާއެއްގައި އިށީނދެލައިގެންނެވެ. އޭރު ވަރުން ދިޔައީ އާލިއާގެ އިސްތަށިގަނޑާ ކުޅެމުންނެވެ. ވާހަކައިގެ ތެރެއިން ވަރުންއަށް ރަންބީރުގެ ނަމުން އާލިއާ މުހާތަބު ކުރުމާއެކު، ސެޓްގައި ތިބި އެންމެނަށްވެސް ސިހުން ގެނުވިއެވެ. މިކަން މިހެން މެދުވެރިވީ، "ކަލާންކް"ގެ މަސައްކަތުގައި އާލިއާ މާ ބިޒީކޮށް އުޅެންޖެހުމުން ލޯބިވެރިޔާ "މިސްވެގެން" ކަމަށް އޭނާގެ ފޭނުން ދަނީ ބުނަމުންނެވެ.
އަބިޝޭކް ވަރުމާން ޑައިރެކްޓްކޮށްފައިވާ ފިލްމް "ކަލާންކް"ގައި އާލިއާއާއި ވަރުންގެ އިތުރުން ދެން ހަރަކާތްތެރި ވަނީ އަދީއްތިޔާ ރޯއީ ކަޕޫރު، ސޮނާކްޝީ ސިންހާ، މަދޫރީ ދިކްޝިތް އަދި ސަންޖޭ ދަތުއެވެ. އިންޑިއާގެ ތިއޭޓަރުތަކުގައި މި ފިލްމު އަޅުވަނީ މިއަދުއެވެ.
