ރައީސް ޔާމީން ހައްޔަރު ކޮށް އުސޫލުން ބޭރުން ބަންދުކޮށްގެން އުޅޭ ކަމަށް ބުނެ ރައީސް ޔާމީން ދޫކޮށްލުމަށް ގޮވާލައި ރައީސް ޔާމީނުގެ ސަޕޯޓަރުން ބާއްވާ މުޒާހަރާ ފަށައިފިއެވެ. އާޓިފިޝަަލް ބީޗުގައި އޮންނަ ކާނިވާ ސަރަހައްދުގައި ބާއްވަމުންދާ މިމުޒާހަރާގައި ގިނަ ބަޔަކު ދަނީ ބައިވެރިވަމުންނެވެ.
ތަފާތު ޝުއޫރުތައް ލިޔެފައިވާ ބެނާ ތަކާ، ރައީސް ޔާމީނަށް ސަޕޯޓު އޮތްކަން ރަމްޒުކޮށްދޭ ޓީޝާޓްލައިގެން ތިބެ ކުރިއަށް ގެންދާ މިމުޒާހަރާގައި ރައްޔިތުންގެ މަޖިލީހުގެ ޕީޕީއެމާ، ޕީއެންސީއަށް ނިސްބަތްވާ މެންބަރުން ގެންދަވަނީ ބައިވެރިވެ ވަޑައިގަންނަވަމުންނެވެ.
މި މުޒާހަރާގައި ބައިވެރިން ގޮވަމުން ދަނީ ރައީސް ޔާމީން ހައްޔަރުކޮށްފައި ވަނީވެސް އުސޫލުން ބޭރުން ކަމަށެވެ. އަދި ބައެއް މެންބަރުން ގެންދަވަނީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ މެންބަރުންނަށް ވޯޓު ނުދިނުމަށް ގޮވާލައްވަމުންނެވެ. އަދި ބައެއް މެންބަރުން ވިދާޅުވަމުން ގެންދަވަނީ ރައީސް އިބްރާހިމް މުހައްމަދު ސޯލިހުގެ ސަރުކާރަކީ ގާނޫނުން ބޭރުން އޮޕަރޭޓު ކުރާ ސަރުކާރެއް ކަމަށާ ރައީސް ސޯލިހުގެ ސަރުކާރު ލަސްތަކެއް ނުވެ ވެއްޓޭނެ ކަމަށެވެ.
"އިބޫ ސޯލިހުގެ ސަރުކާރު ލަސްތަކެއް ނުވެ ވެއްޓޭނެ. ފިނޑި ސަރުކާރު އިސްތިއުފާ" ވިލިމާފަންނު ދާއިރާގެ މެންބަރު އަހުމަދު ނިހާން ހުސައިން މަނިކު ވިދާޅުވިއެވެ.
ރައީސް ޔާމީން ހައްޔަރު ކުރީ ރާއްޖޭގެ ފަހުގެ ތާރީހުގައި ހިންގި އެންމެ ބޮޑު މަނީ ލޯންޑަރިންގެ ހާދިސާ، އެމްއެމްޕީއާރުސީގެ ހިޔާނާތުގެ މައްސަލައިގައި ރައީސް ޔާމީނުގެ އަމިއްލަފުޅު އެކައުންޓަކަށް އެއް މިލިއަން ޑޮލަރު ޖަމާކޮށް މަންފާ ހޯއްދެވިކަމަށް ތަހުގީގުތަކަށް ސާބިތުވެގެންނެވެ.
ރައީސް ޔާމީން މިހާރު ހުންނެވީ ހެކި ނައްތާލައްވަފާނެތީ ޝަރީއަރް ނިމެންދެން ބަންދުކޮށްފައެވެ.
